भांगरभूंय | प्रतिनिधी
गोंयकराच्या घरांत भाड्याक रावून एक दीस तांचेच घर आपले करून घेतात तुमी. गोंयकारांनी कितेंय विचारल्यार रोखडेच झगडूंक एकठांय जातात तुमी…
(काल्सांव बानयान घालून एक मनीस येता) कितें म्हणलें? हांव कोण काय म्हूण विचारता? आरे पापया, तूं म्हाका वळखना? हांऽऽ तूं घांटा वेलो दिसता. आरे हांव मरे तो गोंयकार…! हय हांव गोंयकार! कितें म्हणलें? काल्सांव बानयान कित्याक घातला काय विचारता? काल्सांव बानयान ही गोंयकाराची निशाणी. तुमचे सारकी लुंगी मारून भोंव म्हाणटां? हां तें तूं म्हाका शिकोवं नाका. तुमी भायल्या लोकांनी गोंयांत येवन गोंयची कितली वाट लायल्या ती खबर आसा म्हाका. पान तंबाकू खावन रस्त्यार थुकतात तुमी. मात्शी खांचकट दिसली रे दिसली थंयच मुत्तात तुमी. घरांतलो वोलो, सुको कोयर हाडून रस्त्यार उडयतात तुमी. गोंयकराच्या घरांत भाड्याक रावून एक दीस तांचेच घर आपले करून घेतात तुमी. गोंयकारांनी कितेंय विचारल्यार रोखडेच झगडूंक एकठांय जातात तुमी. कित्याक तर आमकां पासिंयेस आसा. आमी मनशाचेर मोग करतात. सगल्यां मनशांक आमी समान मानतात. जावं मागीर तो भायलो मनीस. ही गोंयकराची कापाझदाद. जिवाक जीव दिवपी आमीच ते गोंयकार.
तुमी गोंया भायले लोक गोंयांत येतात. बरें कोप मारतात आनी दर्यावेळेर वतात. कोणाचें आयकनासतना सोऱ्याच्या नेटार दर्यांत वतात. न्हाता-न्हाता दर्यांत बुडून मरतात आनी नांव घाण जाता आमचें गोंयचें. तुमी करतात तीं कर्मां… कोण सांगतलो तुमच्या कुकर्माच्यो काणयो? गोंयची सोबितकाय तुमच्यांनी पळोवंक जायना. घाण करून उडयलां तुमी गोंय. आमच्या गोंयच्या सोबीत अस्तुऱ्याचेर तुमची वायट नदर आसता. तिची विटंबणा करपाक तुमी फाटीं रावनात. तिचेर अन्याय, अत्याचार तर तुमचे सारके भायलेच करूंक शकतात.
आमची गोंयकारांची मनां नितळ-निवळ. आमी आमच्या जावं खंयचेय अस्तुरेक आवय- भयणी समान मानतात. वेळ आयल्यार तांकां पुज्यनीय देवी समान पांया पडटात. कित्याक तर आमी जाणां अस्तुरी ही संवसाराची आवय. तिच्या अस्तित्वाची राखण करप ही जण एका दादल्याची जापसालदारकी आसा. मागीर तो गोंयकार जावं वा गोंया भायलो.
येयात तुमी आमच्या गोंयांत. हांव येवं नाका म्हणिना. मानशान पोटा खातीर, आपल्या भुरग्याच्या बऱ्या संवसारा खातीर देशांत वा विदेशांत खंयसरूय वचून काम करूं येता. पूण आपूण परके सुवातेर वावुरता हाची मनशान जाणविकाय दवरूंक जाय. आमी आमचे गोंयची सोबितकाय तिगोवन दवरल्या आनी हाचे फुडेंय दवरतले. पूण तुमी भायले लोक हांगा येवन आमचे गोंयची शांती नश्ट करतात. गोंयांत येवन चोरयो करतात, मारामारी करतात, मनशांक तर तुमी पिकिल्लो पणस कसो कापतात. खून करतात. पूण अशें चलून उपकारचें ना. तुमकां जर गोंयांत रावचें आसल्यार गोंयकारा सारके रावचें पडटलें. गोंयची सोबितकाय शांतिकाय वाडोवपा खातीर गोंयकारा वांगडा वावुरचें पडटलें. गोंयकाराच्या मोवाळ काळजाक समजून घेवचें पडटलें. तांच्या मनांत देवून पळोवचें पडटलें. तेन्नाच तुमकां कळटलें कितें आसता तो गोंयकार.
पयरचीच गजाल सांगता… पणजे मिरामार वेळेर एक भोंवडेकार आपले कपडे वयर दवरून दर्यांत न्हावंक गेल्लो. कपड्या वांगडा ताचो मोबायल, घडयाळ आनी पांयांतले बूट दवरले. तो दर्यांत न्हाता- न्हाता हेवटेन कोणें तरी ताचें सगलें सामान उखल्लें (चोरलें ) बाबडो चड्डेनच वयर येवन बोब मारूंक लागलो. पूण कोणूच ताका मजत करपाक आयलो ना. वेल्यान ताचो असो अवतार पळोवन हांसपाक लागले. मोबायलाचेर फोटो काडपाक लागले.
म्हज्यान तें पळोवं नजं जालें. हांवें म्हज्या आंगा वयलें बानयान ताका दिलें, पांयातलें जोतें दिलें आनी ताका सांगलें ह्यो ज्यो तुज्यो वस्ती चोरल्यात न्हय, त्यो तुमच्याच मदल्या कोणेय भायल्यांनीच चोरल्यात आसतल्यो. असलीं कर्तुबां गोंयकार केन्नाच करचेनात. हें आयकून ताणें म्हाका वेंग मारली, म्हणूंक लागलो…
‘पातरांम, तुम बहुत अच्छा आदमी है! तुम्हारा उपकार हम कभी नहीं भुलेगां!”
हांवें म्हणलें… ‘हांव अच्छा आदमी न्हय रे बाबा आनी कोणाकूय उपकारा पडप हें तर आमच्या रगतांतूच आसा. कित्याक तर आमी गोंयकार..!
अविनाश कुंकळकार
7875237830
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
