भांगरभूंय | प्रतिनिधी
‘द बंगाल फायल्स’ वादाचेर शाश्वत चॅटर्जी हांचें स्पश्टीकरण
कोलकाता, खबरां संस्था: अभिनेतो शाश्वत चॅटर्जी हांणी हालींच एका चॅनलाक दिल्ले मुलाखतींत ‘द बंगाल फायल्स’ चित्रपटावेल्या वादा पसून स्वताक पयस दवरीत स्पश्ट केलें की, ते इतिहासकार न्हय तर फकत अभिनेते आसात. कथा राजकी नदरेन योग्य आसा काय ना हें तपासप तांचें काम न्हय. ‘द दिल्ली फायल्स’वेल्यान चित्रपटाचें नांव ‘द बंगाल फायल्स’ कित्याक बदल्लें हाची म्हायती म्हाका ना, अशेंय तांणी सांगलें.
चित्रपट निर्मात्यां आड १९४६ च्या दंगलीच्या चित्रणावेल्यान जायत्यो कागाळी दाखल जाल्यात. कोलकात्यांतली ट्रेलर लॉन्च कार्यावळ कथीत राजकी चेंपणाक लागून रद्द केली. ‘द बंगाल फायल्स’त स्वातंत्र्य सैनीक गोपाल मुखर्जी हांच्या व्यक्तिमत्त्वाचें विकृत चित्रण केल्ल्याचो आरोप करून हिंदूं आडच्यो दंगली आडावपा खातीर म्हत्वाची भुमिका केल्ल्या मुखर्जी हांचो नातू शांतनु मुखर्जी हांणी दिग्दर्शक विवेक अग्निहोत्री हांचे आड कागाळ दाखल केल्या.
मुलाखतींत शाश्वत चॅटर्जी हांणी सांगलें, हांव फकत अभिनेतो. इतिहासाचो विपर्यास जाता काय ना हें तपासप म्हजें काम ना. जर बंगालची बदनामी जाता अशें कोणाक दिसता जाल्यार तांणी न्यायालयांत वच्चें. फकत बोवाळ करून कितेंच साध्य जावपाचें ना.
शुटिंगा मजगतीं चित्रपटाचें नांव ‘दिल्ली फायल्स’ आशिल्लें. शुटींग पुराय जाले उपरांतूच म्हाका तें ‘द बंगाल फायल्स’ अशें बदलिल्ल्याचें समजलें. हें म्हज्या हातांत नाशिल्लें, अशें तांणी सांगलें.
‘द बंगाल फायल्स’त मिथुन चक्रवर्ती, अनुपम खेर, मोहन कपूर, दिव्येंदु भट्टाचार्य, पल्लवी जोशी, शाश्वत चॅटर्जी आनी पुनीत इस्सार हांचे सयत जायते कलाकार आसात. हो चित्रपट ५ सप्टेंबराक प्रदर्शीत जातलो.
निर्मातो, दिग्दर्शक विवेक अग्नीहोत्री हांणी आतां मेरेन काश्मीर, केरळ आनी आतां बंगाल राज्यांतल्या हिंदू आडच्या घडणुकांचेर सिनेमा केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
