भांगरभूंय | प्रतिनिधी
पणजी : सांकवाळ-झुआरीनगरच्या तंत्र शिक्षण संस्था बिट्स पिलानीच्या के. के. बिर्ला कॅम्पसांत परत एक फावट तरणाट्यान आत्महत्त्या केल्ल्यान बरोच खवदळ जाला. २० वर्सां पिरायेच्या ऋषी नायर ह्या विद्यार्थ्यान ४ सप्टेंबराक आत्महत्या केल्या. फाटल्या धा म्हयन्यांत सेगीत पांच विद्यार्थ्यांनी आत्महत्या केल्ल्यान हे संस्थेचेर प्रस्न येवन उबो रावला. पुलिसांनी ताच्या मरणाचें नेमकें कारण सोदपाक सुरवात केल्या.
१६ ऑगस्टाक तिसर्या वर्साचो विद्यार्थी कुशाग्र जैन (लखनौ) आपले कुडींत मरण आयिल्ले अवस्थेंत सांपडिल्लो. अभ्यासाचो, मानसीक ताण वा हाचे फाटल्यान हेर कितेंय कारण आसा काय, हाचो तपास सुरू आसतनाच आनीक एका विद्यार्थ्यान आपलो जीव सोंपयलो. हाका लागून बिट्स पिलानीतल्या घडामोडींचेर गंभीर प्रस्न चिन्न येवन उबें रावलां.
डिसेंबर २०२४ सावन सुरू जाल्ले हे माळेंत सगल्यांत पयलीं उत्तर प्रदेशांतलो ओम प्रियान सिंग ह्या दुसर्या वर्साच्या विद्यार्थ्यान आत्महत्या केल्ली. उपरांत मार्च २०२५ वर्सा अथर्व देसाय, जाल्यार मे २०२५ वर्सा २० वर्सां पिरायेचो कृष्णा केसरा हो विद्यार्थी मरण आयिल्ले अवस्थेंत सांपडिल्लो. उपरांत ऑगस्टांत कुशाग्र जैन, आनी आतां सप्टेंबरांत ऋषी नायर ह्या विद्यार्थ्यांच्या आत्महत्येन बिट्स पिलानी कॅम्पसाचेर व्हड प्रस्न उबो रावला.
राज्यपाल पी. एस. श्रीधरन पिल्लई हांणी ह्या मरणाचेर दुख्ख उक्तावन संस्थेक कारणां आनी प्रतिबंधात्मक उपायांचेर सविस्तर अहवाल सादर करपाचे निर्देश दिल्ले. ते प्रमाण मे २०२५ वर्सा बिट्स पिलानीन अहवाल सादर जरी केल्लो तरी तो आजूनय भौशीक करूंक ना.
बिट्स पिलानी हे संस्थेंत देश आनी विदेशांतले शेंकड्यांनी विद्यार्थी तांत्रीक शिक्षण घेतात. फाटल्या धा म्हयन्यांत घडिल्ल्या घडणुकांनी ह्या शिक्षणीक संस्थेची प्रतिमा इबाडल्या. अभ्यासाचो ताण, रॅगींग वा हेर कारणांक लागून ह्यो घडणुको परत परत घडिल्ल्यो पळोवपाक मेळटात. तशेंच ह्या घडणुकांचो तपास करपाकूय यंत्रणां आनी शिक्षण संस्थेच्या प्रशासनाक आजूनय येस येना.
कुशाग्र जैनाचे आत्महत्ये उपरांत बिट्सांत प्रशासनान नेटान विशेश मोहीम, गरजेच्यो उपाय येवजण्यो चालीक लावपाक पावलां उखलिल्ल्याचें सांगिल्लें. मात आयज घडिल्ले घडणुकेंत ह्यो सगल्यो गजाली चालीक लागूंक नात, हें स्पश्ट जालें. सेगीत घडपी घडणुकांक लागून विद्यार्थ्यांच्या पालकां मदींच भंयाचें वातावरण आसा. संस्थेची प्रतिश्ठा सध्या इबाडिल्ल्यान प्रशासनाचे चारूय वटेन ताण वाडला. पुलिसांनी घडणुके सुवातेर पंचनामो करून आत्महत्येचें कारण सोदपाक सुरवात केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
