भांगरभूंय | प्रतिनिधी
खबरां संस्था
हांगझोऊः आशियाई खेळां सर्तीतली भारताच्या बायलांच्या हॉकी पंगडाची जैताची माळ सुरू आसा. ग्रुप स्टेजींत हार घेनास्तना तांणी सेमीफायनलींत प्रवेश केला. तांच्या निमाणे मॅचींत हाँगकाँगाक 13-0 अशें व्हडल्या फरकान हारयलें. भारतीय स्ट्रायकर वंदना कटारिया, दीप ग्रेस एक्का आनी दीपिकान हॅट्टिक केली. ताका लागून भारताक व्हें व्हड जैत मेळ्ळें.
वंदना कटारिया सामकें फॉर्मांत आशिल्लें. दुसऱ्या, 16व्या आनी 48व्या मिनटाक ताणे गोल केले. दीप ग्रेसान 11व्या 34व्या आनी 42व्या मिनटाक पेनल्टी कॉर्नराचें गोलांत रुपांतर केले. दीपिकान 4थ्या, 54व्या आनी 58व्या मिनटाक गोल केले. संगीता कुमारी, मोनिका आनी नवनीत कौर हांणी गोल करून पंगडाच्या जैतांत मोलाचो वाटो उखल्लो.
भारता खातीर तांची ही मॅच पूल ए मदली चवथी मॅच आशिल्ली. बऱ्या गोल फरकान जैत मेळोवन भारतान आपल्या गटांत 10 गुणांनी पयली सुवात मेळयली. ह्या गटांत दक्षीण कोरिया 7 गुणांनी दुसरे सुवातेर आसा. सर्तीच्या नेमा प्रमाण दरेका पुलांतल्यान दोन पंगड उपांत्य फेरये खातीर पात्र थारतात. हाँगकाँग आडचे मॅचींत भारतान पयल्या दोन क्वॉर्टरांत स आनी हाफ टायमा उपरांत सात गोल केले. नवनीत कौराच्या पासाचेर वंदनान पयल्या दोन मिनटांत भारताक आघाडी घेवन दिली. ह्या उपरांत एका फाटल्यान एक गोल जायत गेले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
