भांगरभूंय | प्रतिनिधी
ल्हवू ल्हवू हवामान बदलपाक सुरवात जाल्या. सकाळीं आनी सांजवेळार थोडी थंडसाण जाणवता. हवामानांतल्या ह्या बदलाक लागून जायते विशाणू सक्रिय जाल्यात. देखून लोकांक थंडी आनी खोंकली सारकिल्या समस्यांचो त्रास जावपाक लागला. खोंकली आनी थंडी हांचो संसर्ग एका मनशा कडल्यान दुसऱ्या मनशाक पातळटा. कांय जाणांक थंडी आनी खोंकली सयत जोरय येता. अशीं लक्षणां व्हायरल जोराचीं आसतात अशें दोतोर सांगतात.
दोतोरांच्या मतान, व्हायरल जोराक लागून कुडीचें तापमान वाडटा. ह्या काळांत कांय जाणांक आंग दुखप आनी थंडसाण जाणावता. ताका लागून नाक व्हांवता आनी खोंकली येता. चडशे फावट खोंकली मात्शी उरता, पूण तकली दुखप आनी नाक व्हांवप खर आसता. हीं सगळीं लक्षणां व्हायरल जोराचीं आसात.
पावस सोंपता आनी हवामानांत उमाशे सावन बदल जाता तेन्ना व्हायरल जोराची प्रकरणा मुखार येतात अशें वरिश्ठ दोतोर सांगतात. हो एक प्रकारचो सामान्य जोर आसून, तो नेटान पातळटा. दुयेंतीक खोंकली वा शिंक येता तेन्ना हो व्हायरस हवेंतल्यान पातळटा आनी हेर लोकांक संसर्ग जाता.
जे लोक नितळसाण दवरनात आनी खातना हात धुवनात, तांकां विशाणूंची बादा जावपाचो चड धोको आसता. विशाणू जोर घरांतल्या एका मनशाक आयलो जाल्यार हेर लोकांकूय ताचो संसर्ग जावं येता. खास करून जाण्टे, रोगप्रतिकार शक्त दुबळी आशिल्ल्या लोकांक आनी भुरग्यांक हाचो धोको चड आसता.
व्हायरल जोराचीं लक्षणां दिसल्यार दोतोराचो सल्लो घेवचो. उपचारा वेळार विसव घेवची आनी भरपूर उदक, आडसराचें उदक पियेंवचें आनी फळां खावचीं. जोर वाडलो जाल्यार दोतोराच्या सल्ल्यान डोलो वा पॅरासिटामॉल वखद घेवचें. ह्या काळांत पेन किलर वखदां घेवप टाळचें. खोंकली आनी शिंकता तेन्ना तोंड आनी नाक धांपपाची जतनाय घेवची. जोर वाडता, आंगार तांबडे फोड आयल्यार वा स्वास घेवपाक त्रास जाल्यार रोखडेंच हॉस्पिटलांत वच्चें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
