भांगरभूंय | प्रतिनिधी
उण्या दाबाच्या पट्याक लागून पावसाचो अदमास
भांगरभूंय I प्रतिनिधी
पणजी : राज्यांतल्या कांय वाठारांत बुधवारा सकाळीं दमट हवामान आशिल्लें, पावसाची मात नोंद ना. तामिळनाडू ते कोंकण मेरेन उण्या दाबाच्या पट्याक लागून फुडले चार दीस पावसाचो अदमास हवामान खात्यान उक्तायला. दमट हवामानाक लागून पयलीं भशेन गरमी कायम आसा.
मार्च म्हयन्याची सुरवात खर तापमान वाडीन जाल्या. पणजे तशेंच मुरगांवचे चडांत चड तापमान 35 अंशा फुडें पाविल्लें. हवामानांत ओलसाणीचे प्रमाण वाडिल्ल्यान उण्या दाबाचो पट्टो तयार जाला. हो पट्टो आतां तामीळनाडू ते कोंकण मेरेन पातळ्ळा. उण्या दाबाच्या पट्याक लागून सोमारा सावन गडगडाटा सयत पावसाचो अदमास हवामान खात्यान उक्तायला. तीन दीस तरी खंयच पावसाची नोंद ना. अदींमदीं दमट हवामान जाता. बुधवारा सकाळीं सगल्याक दमट हवामान आशिल्लें. हाका लागून पावस पडपा सारकी स्थिती आसली. दनपारां खर वत पडले. पणजेचें चडांत चड तापमान 33.2 अंश डिग्री सेल्सियस आशिल्लें. तापमाना एक वा दोन अंशांनी उणें जालां. पूण गरमे सावन थाकाक मेळूंक ना. उण्या दाबाच्या पट्ट्याक लागून राज्यांत पावस पडपाची शक्यताय आसा. मात हो पावस कांय वाठारांनी पडटलो. बुधवारा सांजे 6 वराचेर धारबांदोडें, सांगें आनी काणकोण वाठारांत पावसाची शक्यताय आशिल्ली, अशी म्हायती हवामान खात्यांतले वैज्ञानीक राहुल एम हांणी दिली.
हालीच्या दिसांनी ‘डॉपलर रेडार’ तशेंच आधुनीक तंत्रज्ञानाच्या मजतीन हवामान खातें हवामानाचो अदमास जारी करता. हाका लागून हवामान खात्याचो अदमास पयलीं परस अचूक आसता. हे खेपे मात अदमास उक्तायला ते प्रमाण अजून पावस पडूंक ना.
19 मार्च मेरेन कांय वाठारांत पावस पडपाचो हवामान खात्याचो अदमास आसा. येत्या चार दिसांत चडांत चड तापमान 32 ते 34 अंश डिग्री सेल्सियस उरतलें. दर्या खवदळिल्लो आसतलो आनी ल्हारां 0.5 ते 0.8 मिटर उंचाये मेरेन उसळपाचो अदमास
आसा.
उण्या दाबाच्या पट्ट्याचो प्रभाव पयस जाले उपरांत परतून तापमान वाडपाची शक्यताय आसा. तशेंच दिसाचें तापमान चड आसता आनी रातीचें तापमान उणें आसता. तापमानांतल्या फरकाक लागून रातचो दव पडपूय चालूच आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
