भांगरभूंय | प्रतिनिधी
अंदूं आंब्याचें पीक सरासरी परस 40 टक्के उणें
भांगरभूंय । प्रतिनिधी
पणजी : काजी उपरांत अंदूं बाबत हवामानाचो आंब्यांकूय मार बसला. आडवेळो पावस आनी वाडट्या तापमाना खातीर गोंयकारांक अंदूं फळांच्या राजाचो आस्वाद आदले भशेन घेवपाक मेळचो ना. हाचो परिणाम म्हूण मानकुराद आंबो अजून 1600 ते 1800 रूपया डझन आसा.
गोंयांत 5 हजार हॅक्टर वाठारांत आंब्याची लागवड जाता. सरासरी हॅक्टरा फाटल्यान 2 टन आंब्यांचें पीक येता. हाका लागून गोंयांत 10 हजार टन आंब्यांचें पीक येता. अंदूं 6 हजार टना वयर पीक पावचें ना, अशी सध्याची स्थिती आसा. हे विशीं म्हायती दितना शेतकी खात्याचे संचालक संदीप फळदेसाय सांगतात, पोरूं लेगीत आंब्यांचें पीक उणें आशिल्लें. अंदूं लेगीत उणेंच आसा. सरासरीच्या 40 टक्क्यां परस पीक उणें आसा. तरी तें पोरूं आसलें तितले मेरेन पावतलें. अंदूं उसरां मेरेन पावस पडलो. उपरांत तापमान वाडपाक लागलें. हाका लागून आंब्यांचो चंवर करपलो. बार्देस, तिसवाडी आनी साश्ट म्हालांत आंब्यांचें पीक चड जाता, अशें तांणी सांगलें.
डोंगुर्ली – ठाणे वाठारांत नेस्टर रेंगल हांची आंब्यांची लागवड आसा. मानकुराद, केसर, आम्रवल्ली हांचे सयत 70 जातींच्या आंब्यांची लागवड तांणी केल्या. दर वर्सा 1 लाख आंबो आपूण विकता. अंदूं 25 हजारां वयर आंबो जावचो ना, अशें नेस्टर रेंगल हांणी सांगलें.
तापमान वाडलें हाका लागून चंवर करपलो. तापमानाचो मार बसलो. तशेंच अंदूं आपणे सारें घालपा सयत आंब्या खातीर चड वावर करूंक ना. हाका लागून आपल्याक पीक उणें जातलें, अशें रेंगल हांणी सांगलें.
पणजेचे आवेर्तान मिरांडा हे शेतकारांक आंब्याची लागवड तशेंच जतनाये विशीं मार्गदर्शन करतात. बाबत हवामानाचो अंदूं व्हड प्रमाणांत आंब्यांक मार बसला. सारें तशेंच हेर कामां खातीर शेतकारांनी केल्लो खर्च फुकट गेला. अंदूं 50 टक्क्यां वयर आंब्यांचें पीक मेळचें ना, अशें तांणी सांगलें.
गोंयचे आंबे बाजारांत येवपाक लागले उपरांत आंब्यांचें दर उणें जातात. अंदूं गोंयचें पीक उणें आशिल्ल्यान दर वाडिल्लेच उरतले, अशी सध्याची स्थिती आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
