भांगरभूंय | प्रतिनिधी
नवी दिल्ली, खबरां संस्था ः उत्तर आनी मध्य भारतांतल्या कांय वाठारांनी उश्णताय ल्हारांक लागून भाजी आनी दाळ म्हारग जाल्या. फुडल्या म्हयन्यांतूय हीच परिस्थिती उरतली. खासा करून बटाट, टोमॅटो, कांदो हांचे दर वाडिल्ल्यान घरगुती जेवणाचो खर्च वाडलो. एप्रीलांत भाजयेचे दर फाटल्या वर्सा परस सरासरी 27.8 टक्क्यांनी चड आशिल्ले. उश्णतायेच्या ल्हारांक लागून भाजी आनी दाळांचो खर्च 40 टक्क्यांनी म्हारग जाला.
भाजीपालो, कड्डण हांचे दर वाडिल्ल्यान किरकोळ म्हारगाय मार्चांत 8.52% आशिल्ली ती एप्रिल 2024 वर्सा 8.7 टक्क्या मेरेन वाडली. गिरायक वेव्हार मंत्रालयाच्या आंकड्यां प्रमाण फाटल्या वर्साच्या तुळेंत मे म्हयन्यांत बटाट्याचें मोल सुमार 42 टक्क्यांनी वाडलां. कांदो 40 टक्क्यांनी आनी टोमॅटो 31 टक्क्यांनी म्हारग जाला. देशांत मुखेलपणान वापरांत आशिल्ल्या तूर आनी मूग दाळींचे दरय फाटल्या वर्सा मे म्हयन्यांचे तुळेंत अनुक्रमान 30 आनी 9 टक्क्यांनी वाडल्यात. वाडटे उश्णतेक लागून भाजीपाल्याचे दर वाडूंक शकतात आनी म्हारगायेच्या आंकड्यांचेरूय परिणाम जावं येता अशें रिझर्व्ह बँकेच्या गव्हर्नरान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
