भांगरभूंय | प्रतिनिधी
श्रीनगर, खबरां संस्था: भारतान पाकिस्तानाचेर केल्ल्या हवाई हल्ल्याचो देशभरांतल्या विमान उड्डाणाचेर परिणाम जाला. श्रीनगरा सयत ११ विमानतळांचेर कामकाज बंद केलें. हातूंत जम्मू, श्रीनगर, लेह, चंदीगड, बिकानेर, जोधपूर, राजकोट, धर्मशाला, अमृतसर, भुज, जामनगर विमानतळांचो आसपाव आसा. विमान प्रवास पुरायेन विस्कळीत जाला.
हल्ल्या उपरांत विमान कंपनींनी ही म्हायती दिली. एअर इंडियान सांगलें- जम्मू, श्रीनगर, लेह सयत ९ विमानतळांवेलीं आमी सगलीं उड्डाणां आयज १२ वरां मेरेन रद्द केल्यांत. प्रवाशांक तांच्या विमानांची स्थिती तपासले उपरांतूच विमानतळार वचपाची मागणी केली. हेल्पलायन क्रमांकूय जारी केला.
विमान कंपनींचें निवेदन
इंडिगो: प्रदेशांतल्या हवाई परिस्थितींतल्या बदलाक लागून श्रीनगर, जम्मू, अमृतसर, लेह, चंदीगड, बिकानेर आनी धर्मशाळा वचपी आनी येवपी विमानांचे येरादारीचेर परिणाम जाला. विमानतळार वच्चें पयलीं फ्लायटीची स्थिती तपासची.
स्पायसजेट: ऑपरेशन सिंदूराक लागून, उत्तर भारतांतली धर्मशाळा, लेह, जम्मू, श्रीनगर आनी अमृतसर अशे कांय विमानतळ फुडल्यो सुचवण्यो मेळ मेरेन बंद केल्यात. ह्या विमानतळांवेल्यान येवपी आमच्या विमानांच्या येवप आनी वचपाच्या वेळार परिणाम जावपाक शकता. प्रवाशां कडेन मागणी आसा, तांणी तांच्या प्रवासाचें नियोजन करचें आनी स्पायसजेटचे वेबसायटीचेर तांच्या फ्लायटची स्थिती तपासची.
एअर इंडिया: जम्मू, श्रीनगर, लेह, जोधपूर, अमृतसर, भुज, जामनगर, चंदीगड आनी राजकोटाक वचपी आनी येवपी सगळीं उड्डाणां ७ मेक दनपरां १२ वरां मेरेन रद्द. अधिकार्यांक मेळ्ळे उपरांत चड म्हायत दितले. अमृतसराक वचपी दोन आंतरराष्ट्रीय विमानां दिल्ली वटेन वळयलीं. ह्या अचकीत जाल्ल्या गैरसोयी विशीं आमी दिलगीर आसात. प्रवाशांचे वेवस्थे खातीर ०११-६९३२९३३३ / ०११-६९३२९९९९ हे हेल्पलायन नंबर आसात.
एअर इंडिया एक्सप्रेस : अमृतसर, जम्मू, श्रीनगर आनी हिंडनाक वचपी आनी येवपी विमान कंपन्यो ७ मेक दनपार मेरेन रद्द केल्यात. गैरसोयी विशीं आमी दिलगिरी आसात. सगल्या प्रवाशां कडेन मागणी आसा, तांच्या फ्लायटाची स्थिती तपासची. फ्लायटी कडेन संबंदीत सुचवण्यां खातीर +९१ ६३६०० १२३४५ ह्या क्रमांकाचेर संपर्क करचो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
