भांगरभूंय | प्रतिनिधी
प्रेमेंद्र शेट: शिकेरी (मयें) आनी हळदोणच्या गांवांक जोडपी पांय पुलाची केली पळोवणी
दिवचल: शिकेरी (मयें) आनी खोर्जुवें, हळदोणच्या गांवांक जोडपी पुलाच्यो ज्यो आडखळी आसात आनी पर्यायी जाग्या विशीं विचार करून, ते नदरेन आराखडो तयार करून सरकारा कडेन पुरायेन नवो पूल उबारपा खातीर प्रस्ताव दितलों अशें मयेंचे आमदार प्रेमेंद्र विष्णू शेट हांणी सांगलें.
शिकेरी (मयें) आनी खोर्जुवें, हळदोणच्या गांवांक जोडपी आदल्या पुर्तुगेज काळांतल्या पांय पुलाची पळोवणी हळदोणचे आमदार कार्लोस अल्वारीस फेरेरा आनी मयेंचे आमदार प्रेमेंद्र विष्णू शेट हांणी अधिकार्यां वांगडा केली.
ह्या वेळार भौशीक बांदकाम खात्याचे अभियंते, जिल्हो परिशद वांगडी शंकर चोडणकार, पंच वांगडी कृष्णा चोडणकार, मयें भाजपा मंडळाचे अध्यक्ष दया कारबोटकार, विश्वास चोडणकार आनी थळावे व्हडा संख्येन हाजीर आशिल्ले.
हो साकोव बरोच आदलो आशिल्ल्यान हे वाटेवेल्यान दोन चाकी गाडयो आनी लोक यो वच करतात. ह्या पुलाचीं लोखणाचीं कामां काडून हांगा काँक्रीट पूल उबारून लोकांची बरे तरेन वेवस्था करपाची येवजण आशिल्ल्यान ते नदरेन दोन प्रस्ताव तयार केल्यात. हे दोनूय प्रस्ताव सरकाराक सादर करतले, अशी म्हायती आमदार प्रेमेंद्र शेट हांणी दिली.
आमदार कार्लोस फेरेरा हांणी ह्या पुलाक लागून दोनूय गांवांक फायदो जातलो. हांगच्या लोकांची बरी वेवस्था जावची देखून ह्या पुलाचें काम बेगीन जावचे खातीर सहकार्य करतलों, अशें तांणी सांगलें.
ह्या पुलाची खूबशे फावटीं लोखणाचें सामान वापरून दुरूस्ती केल्या. तशेंच पुलार पडिल्लीं फोंडकुलां जायते फावट भरून काडल्यांत. ह्या पुलावेल्यान दिसाक थळावे तशेंच लागसारच्या हेर वाठारांतले खूबशे लोक यो वच करतात. दोन चाकी वाहनां ह्या पुला वेल्यान वतात. हो पूल बांदपाचो प्रस्ताव दिल्ल्यान हांगच्या लोकांनी समाधान उक्तायलां.
पयलेच फावट पुराय पूल उबारपाच्या प्रस्तावाक आमदार शेट आनी फेरेरा हांणी संमती दाखोवन फुडाकार घेतला. हो पूल पुराय जाल्यार हांगच्या लोकांची बरी वेवस्था जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
