भांगरभूंय | प्रतिनिधी
भांगरभूंय । प्रतिनिधी
म्हापशेंः हळदोणे हांगच्या श्री सातेरी भगवती देवस्थानाचो वर्सुकी पालखी उत्सव आनी 29 वो वर्धापन दीस कार्यावळ मंगळार 1 मार्च तें मंगळार 5 मार्च मेरन जातलो. 1 मार्चाक सकाळीं धर्मीक विधी आनी दनपारां 3 वरांचेर पालखी मिरवणुकेक सुरवात जातली. हळदोण बाजारांत सुवासिनीं वतीन पंचारती ओवोळून पालखेक येवकार दितले. उपरांत पालखी देवळांत वतली, 2 मार्चाक दनपारां 3 वरांचेर लक्ष्मण वायंगणकाराच्या येजमानपदा खाला सत्यनारायण पूजा आनी रातीं 8 वरांचेर सातेरी भगवती महिला मंडळा वतीन संगीत सौभद्र नाटकाचो प्रयोग जातलो.
3 मार्चाक अमर मांद्रेकारच्या येजमानके खाला दनपारां सत्यनारायण पूजा, भजन आनी रातयां 8 वरांचेर मैत्री क्रिएशन वतीन अजून मेले झिंदा है ह्या कोंकणी नाटकाचो प्रयोग जातलो. 4 मार्चाक दनपारां 3 वरांचेर शाबी गडेकाराच्या येजमानके खाला सत्यनारायण पूजा, भजन आनी रातयां 8 वरांचेर शुभ टिंगल सावधान ह्या नाटकाचो प्रयोग जातलो. 5 मार्चाक मूर्ती प्रतिश्ठापनेची वर्धापन दीस कार्यावळ जातली. सकाळीं धर्मीक विधी, म्हापूजा आनी म्हाप्रसाद जातलो. साजें 5 वरांचेर हळदोणे मतदारसंघ मर्यादीत नाचाची कार्यावळ आनी रातयां 9 वरांचेर पालखी मिरवणूक आनी तीर्थ प्रसादान उत्सवाचो समारोप जातलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
