भांगरभूंय | प्रतिनिधी
आमदारान घेतली सगळ्या भागधारकांची जोड बसका
भांगरभूंय । प्रतिनिधी
म्हापशें: हळदोणेंची पोरणी तशेंच धोकादायक स्थितींत आशिल्ली मार्केट इमारतीचे सुवातेचेर नवो मार्केट प्रकल्प उबारपाच्या मुद्द्याचेर थळाव्या आमदारान विक्रेते तशेंच वेवसायिकां वांगडा चर्चा केली. ह्या भागधारकां वांगडा अजून कांय बसका घेवन हो प्रकल्प उबारपा संबंदांत ठोस उपाय काडटले, अशें आमदार अॅड. कार्लूस फेरेरा हांणी सांगलें.
आमदार अॅड. फरेरा हांणी सांगलें, हळदोण्यां नवो मार्केट प्रकल्प उबारप हें आपलें प्राधान्य आसतलें. मार्केटा विशीं हे आदींय कांय बसका घेतल्यात. वेवसायिकांच्यो मुळाव्यो समस्या आनी तांचे सगळे मुद्दे बसकेंत चर्चे वरवीं सोडोवपाचो यत्न करतले.
बाजारांत विक्री खातीर बसपी वेवसायिकांक तांच्या वेवसाया खातीर पर्यायी वेवस्था दिवप खूब गरजेचें आसा. इमारत मोडपाचें काम हातांत घेतले उपरांत तांकां थंयच्यान दुसरे कडेन हालोवचे पडटले. ताका लागून तांकां पूर्वकल्पना दिवप गरजेचें आसा, अशें आमदार अॅड. फेरेरा हांणी सांगलें.
ही जमीन चर्चीचे मालकीची आशिल्ल्यान चर्च वेवस्थापनान नव्या प्रकल्पा खातीर अतिरिक्त जमीन दिवपाची तयारी दाखयल्या. फुडल्या दोन दिसांनी तांचे वांगडा आनीक एक जोडबसका घेतले. सगळे मुद्दे विचारांत घेवन योग्य दिशेन वाटचाल सुरू आसा. सगळ्यांक विस्वासांत घेवन प्रकल्पाची उबारणी करतले, अशें आमदार अॅड. फेरेरा हांणी सांगलें.
चर्च वेवस्थापनाची नेमकी अपेक्षा फुडले बसकेंत स्पश्ट जातली. आपणे मुख्यमंत्र्या कडेन हे संबंदांत चर्चा केल्या. तांणी पुराय आदार करपाचें आस्वासन दिलां. आपूण मुळाव्या साधन सुविधा मंडळा कडेन लेगीत चर्चा केल्या, अशी म्हायती आमदार अॅड. फेरेरा हांणी दिली. वेवसायीक दिलीप हळदणकार हांणी सांगलें, मार्केट प्रकल्प बेगिनांत बेगीन उबो जावचो. आमदारान प्रकल्पाचे उबारणेक पुराय आदार करपाची तयारी दाखयल्या. पुनर्वसन जाता ते सुवातेचेर वचपाची आमची तयारी आसा, पूण तसो करार करप गरजेचो आसा. नव्या प्रकल्पांत आमकां आमची सुवात मेळप गरजेचें आसा. किरकोळ विक्रेत्यांक लेगीत तांची नियोजनाची सुवात मेळची, अशी विनवणी आमी आमदार अॅड. फेरेरा हांकां केल्या, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
