भांगरभूंय | प्रतिनिधी
हळदीचें दूद भलायकेचो खजिनो अशें मानतात. थंडी वा खोंकली, कुडींत दुखप, थकवा येवप, वा न्हीद येना जाल्यार रातच्या वेळार एक कप कोमट हळदीचें दुद पियेल्यार आराम मेळटा. हें एक परंपारीक पेय आसा.
2022 वर्सा नॅशनल लायब्ररी ऑफ मेडिसीनांत उजवाडाक आयिल्ल्या अभ्यासा प्रमाण हळदींत ‘करक्यूमिन’ नांवाचें एक बळिश्ट अँटीऑक्सिडंट आसता. जे फ्री-रॅडिकल्साक लागून जावपी लुकसाणा पसून कुडींतल्या पेशींची राखण करता. तशेंच तांकां दुयेंसा आड झुजपाची तांक दिता.
हळदीच्या दुदांत पोशक तत्व
हळदींत मुखेलपणान कर्क्युमिन मेळटा, जें एक बळिश्ट अँटीऑक्सिडंट आनी दाहक-विरोधी घटक आसा. ते भायर तातूंत लोखण, मँगनीज, पोटॅशियम, फायबर, व्हिटॅमिन सी आनी व्हिटॅमिन बी 6 आसता. हे पोशक तत्व रोगप्रतिकार शक्त घट करपाक आनी कुडींतलो दाह उणो करपाक मजत करतात.
दुदांत पोशणाचें भरपूर स्त्रोत आसात. तातूंत प्रथिनां, कॅल्शियम, व्हिटॅमिन डी, व्हिटॅमिन बी 12, फॉस्फरस, पोटॅशियम हांचें प्रमाण चड आसता. घट हाडां, स्नायू आनी मज्जासंस्थे खातीर हीं पोशक तत्वां गरजेचीं आसतात.
हळदीच्या दुदाचे भलायकेक फायदे
हळद आनी दूद ह्या दोनूय प्रकारांच्या गुणधर्मांक लागून हळदीचे दूद भलायकेक खूब फायदेशीर मानतात. हळद कुडींतलो दाह उणो करपाक, रोगप्रतिकार शक्त घट करपाक आनी संसर्गां आड झुजपाक मजत करता.
सांदे दुखी आनी स्नायूंचे रिकव्हरी खातीर दुद उपेगी पडटा. हळदींच्या दुदाक लागून थंडी आनी खोंकलेक आराम मेळटा आनी न्हिदेचें प्रमाण सुदारपाक मजत करता. तशेंच पचन करपाक मजत करता आनी कुडीक भितरल्यान बरे दवरपाक आदार करता.
हळदीच्या दुदांत दालचिनी, आलें वा काळी मिरया मिक्स केल्यार ताचें पोशण घटक आनीक वाडटा. हें नेमान पियेवप भलायके खातीर खूब फायद्याचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
