भांगरभूंय | प्रतिनिधी
यांत पुर्तुगेजांच्या तेंपार चली भुरग्याच्या जल्माचें प्रमाण चल्यां परस चड आशिल्लें. मजगतच्या काळांत तें देंविल्लें. एक हजारा चल्या फाटल्यान 918, 934 जलयो जल्माक येवंक लागल्यो. गोंय सरकाराच्या समाजकल्याण खात्या खाला आशिल्लो बायलां आनी भुरग्यां फांटो वेगळावन 1997 वर्सा बायलां आनी भुरगीं कल्याण खातें जल्मलें, 1998 वर्सां पयलो गोंयचो अस्तुरी आयोग जल्माक आयलो. डॉ. प्रमोद साळगांवकार हांच्या अध्यक्षते खाला गोंयच्या अस्तुरी आयोगान गोंयच्या कोनशा कोनशांतल्या अस्तुरेक जागयत चली भुरग्याचें म्हत्व सांगलें. भुरगें पोटांत आसतना चलो काय चली लिंग तपासपी यंत्रां, फटिंगपणा करपी दोतोरांआड कारवाय करपाक लायलीं. पथनाट्यां जालीं. आतां तरी चली जायच म्हणात हें आमचें लिखाण इनाम जोडपी.
चली भुरग्याच्या जल्माक उर्बा दिवपी, चलयेचो जल्म जिलेबी न्हय दुदफेणे दिवन मनयात अशी जागृताय करपी. चली भुरगें म्हळ्ळ्यार लक्ष्मी, पयल्या चली भुरग्याक येवकार दियात, चलीय जाण्टेपणांत आवय बापायची जतनाय घेवंक शकता, तांचेर निमणे संस्कारय करुंक शकता.
एकलीच चली पुरो, तेंच चलो समजून तिका व्हड करात, तिका शिक्षण चल्यापरस कूसभर चड दिवपाक अनमनूंक नाकात, ती सत्तेचो हकदारय जावंक शकता हें गोंयान दाखोवन दिलां.
2014 – 15 वर्सां देंविल्लें चली भुरग्यांचे प्रमाण वाडलां तर तें सरकाराचें एक व्हड जैत. गोंयच्या मुख्यमंत्र्यांक एक चली, भलायकी मंत्र्यांकय चलयोच. आपल्या चलयांक वाडोवपाची देख दीत तांणी गोंयचें चलयांचे प्रमाण चल्याचे बराबरींत येवचें हे खातीर उलो सदां मारत रावचो. चली भुरग्यांक वाटायात, एक चली वाटावलें तर आवय, भूंय वाटावतली, चलये विणें जिणें ना, चलयेच्या जल्माची खोस वेगळीच आसता, जितली आवय तितलो बापूय चलये कडेन एकरूप जावंक लागला. तिची राखण मेळची म्हूण तो आपली न्हीद खळयता, तिका उंचेलें शिक्षण मेळपाक जाय म्हणून सुकन्न्या, समृद्धी येवजणींनी पयशे जमयता. चली होच चलो हेंच सांगपाचो वगत आयला, चलो जालो ना खंती जावचें न्हय चली हेंच राखणदार समजात, चली भुरग्याचेर अत्याचार करुं नाकात, तिका मनीस म्हणून जियेवपाक दियात हो मंत्र बेटी बचाओ हें सांगतना दियात.
चली भुरग्याच्या जल्मा वांगडा तिच्या उंचेल्या शिक्षणा मेरेनची तजवीज करपी येवजण आयल्यार आई बाबा फकत चलये पासत प्लॅनिंग करुंक शकतले. भुरगेंच नाका अशें सांगपी तरणाटी पिळगी जल्माक येवची न्हय, येता जाल्यार तशें कित्याक जाता हाची कारणां मेकळेपणान सोदपाक जाय. भुरगीं जल्माक आयलीं म्हणून जावची ना, तीं घटमूट आसप म्हत्वाचें. अडेच्या गर्भधारणेचे उपाय आयज आसात, सरोगसी कायदो आयला. जैताची पावलां पडलीं पूण तीं समा आसत, तातूंतल्यान वायट, बरें कितें जालां हें सांगपाची धिटाय भलायकी मंत्र्यांनी दाखोवची.
जल्मल्ल्या भुरग्याक काळजाचीं दुयेंसां कित्याक जातात? प्रदुशण, वातावरण बदलांचे परिणाम गुरवारपणांत जातात तेन्ना जल्माक येवपी दर एका भुरग्याक शुद्ध उदक, वारें मेळटलें ही जतनाय घेवप सरकाराची लागणूक.
आयचें चली फाल्यांची अस्तुरी. चलयेक व्हड करतना आवय बापायक जावपी त्रासां विशीं मुख्यमंत्री, भलायकी मंत्र्यांक आमी सांगपाची गरज ना. आपल्या घरच्या देखींतल्यान तांकां सरकाराचे अस्तुरीनीतींत बदल करपाक येतले अशी आस्त बाळगुया. हर घर बेटी, हर बेटी बचाओ, हर घरके बेटी की पढाई, हर बेटी हो स्वयंपूर्णा, हर बेटी है लक्ष्मी हीं उतरां वण्टी वण्टींचेर पितारपाक जाय नवे कुशळटायेंतल्यान.
चलो, चली दोगांयनी सात वरां पयलीं घरा येयात अशें सांगपाची गरज उपरासल्या? रातींच्या कामकाजांत अस्तुरेक घेवपापासत केल्ले कायदे सारके चालीक लागल्यात? 100 टक्के चलयांक उच्च शिक्षण मेळटा? घराब्यांनी चलयेच्या फुडारा खातीर राखण आसा? भांगरां परस तिची भलायकी, पत्रिकेपरस रगत, तिचें करियराक म्हत्व येवंक लागलां आनी थंयच बेटी बटाओ धोरण जैतवंत जावंक लागलां.
याद येता गोंय बालभवनाची पयली अध्यक्ष विजयादेवी राणे हांचीं. तांकां, डॉ. साळगांवकार हांकां सरकारान यशोदामिनी दिवन कित्याक भोवमान करचो न्हय? घरा वचून. पांचतारांकीत हॉटेलांनी नाका.
सुहासिनी प्रभुगांवकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
