भांगरभूंय | प्रतिनिधी
पणजीः नामनेची लेखिका आनी बालसाहित्यकार हर्षा सद्गुरू शेटये हांकां तांचे ’एक आशिल्लें बायूल’ हे नविलिकेक अंदूंचो साहित्य अकादमीचो बालसाहित्य पुरस्कार फावो जाला. तशेंच अद्वैत साळगांवकार हांकां युवा पुरस्कार फावो जाला.
मराठींत भारत सासणे हांच्या ’समशेर आणि भूतबंगला’ हे कादंबरीक पुरस्कार फावो जाला. ते मराठींतले एक नामेनेचे लेखक आसात आनी कितलेशेच साहित्य प्रकार तांणी हाताळ्ळ्यात. तांचें अदृश्ट, अनर्थ रात्र, अस्वस्थ (दीर्घकथा झेले), आतंक, चल रे भोपळ्या/ हंडाभर मोहरा (नाटकां), दोन मित्र, राहीच्या स्वप्नांचा उलगडा (कादंबरी) हें साहित्य लोकांनी पसंत केलां.
हर्षा शेटये हांणी बाल साहित्याच्या मळार जगमां, चला भारत भोंवुया, बोमाडे, चंपू इन रांदची कूड, एक आशिल्लें बायूल, फुलां, म्हजो जल्मदीस, गोड आनी तीख, हांव कोण? हीं पुस्तकां बरयल्यांत. एक आशिल्लें बायूल ही नवलिका तांणी आपल्या बालपणाचेर बरयल्या. तेन्ना भुरगेंपण कशें आशिल्लें आनी ताचो आनंद तीं कशीं लुट्टालीं हे विशीं तांणी बरयलां.
आमच्या प्रतिनिधीन तांचे कडेन संपर्क सादलो तेन्ना तांणी साहित्य अकादमीचो बाल साहित्य पुरस्कार फावो जाल्ल्यान आपल्याक खूब खोस जाल्या अशें सांगलें. ‘पुरस्कार मेळ्ळा हें कळटकच खूब खोस जाली. म्हज्या वाचकांनी दिल्ल्या प्रतिसादाक लागून हांव बरयत आसा. तांणी खूब मोग दिला आनी हे खातीर हो पुरस्कार हांव तांकां ओंपतां,’ अशें हर्षा शेटये हांणी मुखार सांगलें. अद्वैत साळगांवकार हे युवा लेखक आपले बरपावळींतल्यान कोंकणी साहित्यांत भर घालीत आसात. गांवांतली संस्कृताय आनी परंपरा हे विशीं तांणी भांगरभूंयचेर लेख बरयल्यात. ’पेडण्याचा सामारां’ ह्या तांच्या पुस्तकाक हो पुरस्कार फावो जाला. पुरस्कार मेळिल्ल्याची खोस उक्तायतना हो पुरस्कार आपणें पुस्तकांत वापरिल्ले पेडणेंचे बोली भाशेक, संस्कृतायेक आनी लोकांक ओंपतां अशें तांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
