हरीश राणा चलता ‘इत्सा मरणा’ची वाट

भांगरभूंय | प्रतिनिधी

गाझियाबाद, खबरां संस्थाः 13 वर्सां कोमांत (ब्रेन डेड) आशिल्ल्या गाजियाबादच्या हरीश राणाक मंगळार सावन उदक दिवप बंद केलां. ताका हेर कसलोच ऑक्सिजन आदार दिवंक ना. पयलीं नळयेंतल्यान जेवण दिताले. आतां तेंय बंद केला.
दिल्ली एम्सांतल्या दोतोरांचो पंगड हरीशाच्या दर एका नाडीचे निरीक्षण करता. दरेक प्रक्रिया टप्प्या टप्प्यान पाळून जिवीत वाचवपी उपकरणां काडपाचें काम सुरु आसा.
खरें म्हणल्यार सर्वोच्च न्यायालयान 11 मार्चाक हरीशाक इत्सा मरणाची परवानगी दिली.14 मार्चाक गाजियाबादच्या राजनगरांतल्या राज एंपायर सोसायटींतल्या घरांतल्यान हरिशाक एम्सांत व्हेलो.
न्यायालयाच्या निर्देशा प्रमाण, ही पुराय प्रक्रिया 16 मार्च (सोमारा) सावन सुरू जाली. आतां एम्सांत ताचे फोटो आनी व्हिडियो काडपाचेर पुराय बंदी घाल्या. कुटुंबाक वा हेर कोणाकूय हरीशाक मेळूंक मेळना.

दोतोरांचो पंगड निरिक्षण करता

31 वर्सां पिरायेचो हरीश राणा सध्या एम्सांतल्या आयआरसीएचच्या पॅलिएटिव्ह केअर वॉर्डांत आसा. हांगा ताका ‘इत्सा मरणाची’ परवानगी दिवपी सर्वोच्च न्यायालयाच्या निर्णयाची अंमलबजावणी करपा खातीर पुराय प्रोटोकॉल तयार केला. हे खातीर सोमारा दोतोरांची व्हडली बसका जाली. हाचे उपरांत सांजवेळा उसरां ताका नळयेंतल्यान जेवण दिवंक नाशिल्लें. ताचो ऑक्सिजन आदारूय काडून उडयलो. जेवण आनी उदक बंद केले उपरांत फकत एक ते दोन सप्तक मनीस जियेवंक शकता अशें दोतोरांनी सांगलें.
हरीशाक एम्सांत व्हरतना ब्रह्मकुमारी लवली ताच्या घरा पावली. तिणें हरीशाच्या कपलाचेर चंदनाची तिकली लायिल्ली. तिणें ताचे तकलेचेर हात फिरोवन म्हणलें- ‘सगळ्यांक माफ करून आनी सगळ्यांची माफी मागत आतां वच’. ह्या वेळार हरीशाच्या घराण्यांतले सगळे वांगडी रडपाक लागले. ताचो बापूय अशोक हाणें कुटुंबांतल्या सगळ्या वांगड्यांची माफी मागली. नाका आसतना लेगीत हें पावल उखलचें पडलें अशें ताणें सांगलें.

नेमकें कितें जाल्लें?

दिल्लींत जल्मल्लो हरीश राणा चंडीगडच्या पंजाब युनिव्हर्सिटींतल्यान बीटेक शिकतालो. 2013 वर्सा निमाण्या सत्रांतल्या अभ्यासा वेळार तो आपल्या हॉस्टेलाच्या चवथे माळयेवयल्यान पडलो. ह्या अपघाताक लागून तांकां गंभीर जखम जाली आनी तो कोमांत गेलो.
दोतोरांनी हरीशाक क्वाड्रिप्लेजिया नांवाचें गंभीर दुयेंस आशिल्ल्याचे सांगलें. हे स्थितींत दुयेंती फीडिंग ट्यूब आनी व्हेंटिलेटराच्या आदारान जिवो उरता. दोतोरांच्या म्हणण्या प्रमाण, हातूंत बरे जावपाची शक्यताय नासता.
फाटलीं 13 वर्सां सेगीत खाटीर न्हिदून उरिल्ल्यान हरीशाच्या आंगाचेर बेडसोल जाल्लें. काळा प्रमाण तांची भलायकी आनीक इबाडत वताली. ताका अशे अवस्थेंत पळोवप कुटुंबाक खूब कठीण वताले.