भांगरभूंय | प्रतिनिधी
उरिल्ल्या कराचे चवकशे खातीर सभाघर समितीची विरोधकांची मागणी
पणजीः कोळसो आनी पॅट्र्लियम कंपनीं कडल्यान हरीत कर (ग्रीन सेस) वसुलीच्या मुद्द्या वयल्यान विरोधी पक्ष फुडारी युरी आलेमांव आनी मुख्यमंत्री डॉ. प्रमोद सावंत हांचें शुक्रारा विधानसभेंत पेटलें. हरीत कराचो विशय सध्या सर्वोच्च न्यायालयांत आसा. तरी लेगीत सरकारान कोळसो आनी पॅट्रोलियम पदार्थांची येरादारी करपी कंपनीं कडल्यान उरिल्ल्या करांतलो 50 टक्के कर वसूल केला, अशें मुख्यमंत्र्यान स्पश्ट केलें. जाल्यार सरकारान अदानी, जेएसडब्ल्यू कंपनीं कडल्यान जाणिवपूर्वक कर वसूल करूंक ना, असो आरोप करून ह्या प्रकरणाचे चवकशे खातीर सभाघर समितीची स्थापना करची, अशी मागणी आलेमांव हांणी केली.
दोन दिसांच्या विधानसभा अधिवेशनाच्या काल कामकाजाच्या दिसाच्या प्रस्नजापेच्या वराक युरी आलेमांव हांणी हरीत कराचो विशय उपस्थीत केलो.
गोंयांतल्यान कोळसो तशेंच पॅट्रोलियम पदार्थांची येरादारी करतना पर्यावरणाक लुकसाण जाता. ते खातीर अश्या वस्तूंची येरादारी करपी कंपनीं कडल्यान हरीत कर वसूल करपाचो निर्णय 2012 त पर्रीकार सरकारान घेतिल्लो, पूण 2012 सावन आतां मेरेन विवीध कंपनीं कडल्यान हरीत कर वसूल जावंक ना. अदानी, जेएसडब्ल्यू ह्या सारक्या कंपनीं कडल्यान सरकारान जाणिवपूर्वक कर वसूल करूंक ना. ताका लागून हातूंत व्हड घोटाळो जाला, ताची चवकशी करचे खातीर सरकारान सभाघर समितीची स्थापना करची, अशी मागणी आलेमांव हांणी लावन धरली. काँग्रेस आमदार एल्टन डिस्टा, आपचे आमदार व्हेन्झी व्हिएगश हांणीय आलेमांव हांचे मागणेक तेंको दिलो.
आलेमांव हांकां जाप दितना मुख्यमंत्री डॉ. सावंत हांणी सांगलें, गोंयांतल्या हरीत कराचो विशय सध्या सर्वोच्च न्यायालयांत पडून आसा. तरी लेगीत सरकारान कोळसो आनी पॅट्रोलियम कंपनीं कडेन उरिल्ल्या 352 कोटी रुपयांतो 50 टक्क्यां परस अदीक म्हणल्यार 237.70 कोटींचो कर वसूल केला. ह्या कंपनीं कडेन अजून सुमार 114 कोटींचो कर उरला. सर्वोच्च न्यायालयांत चालू आशिल्लो हे संबंदांतलो खटलो निकालात काडटाच उरिल्लो कर लेगीत वसूल करतले, अशी हमी मुख्यमंत्र्यान दिली.
सभापतींची आमदारांचेर परतून बडी
हरीत कराच्या विशया वयल्यान युरी आलेमांव आनी मुख्यमंत्री डॉ. सावंत हांचे मदीं वाद तयार जाले उपरांत आमदार एल्टन डिकॉस्टा आनी व्हेन्झी व्हिएगश हांणी तातूंत उडकी मारली. आलेमांव हांणी पयलीं मुख्यमंत्री आनी ते उपरांत अक्षय उर्जा मंत्री सुदिन ढवळीकार हांचेर लेगीत ह्या विशया वयल्यान टिका करपाक सुरवात केली. ताका लागून सभाघरांत गोंदळाचें वातावरण तयार जाल्ल्यान सभापती रमेश तवडकार लेगीत आक्रमक जाले. आमदारांनी सभाघराची शिस्त पाळची, अशी बडी तांणी आमदारांचेर मारली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
