भांगरभूंय | प्रतिनिधी
रोहतक, खबरां संस्था: हरियाणाच्या रोहतकांतल्या महर्षी दयानंद विद्यापीठांतल्या चार बायलां कर्मचार्यांक तांचे मासीक पाळयेचो पुरावो दिवपाक सांगलें. तशेंच तांकां कपडे काडचे पडले आनी सॅनिटरी पॅडाचे फोटोय काडचे पडले. हे घडणुके उपरांत, दुबावीत पर्यवेक्षकाक निलंबीत केलो.
ही घडणूक २६ ऑक्टोबराक घडली. बायलांनी घडणुकेचो फोटो आनी व्हिडिओ हरियाणा बायलां आयोगाक धाडले तेन्ना हें प्रकरण उक्तडार आयलें. बुधवारा आयोगान विद्यापीठ प्रशासनाक पर्यवेक्षकाक बडतर्फ करपाक सांगलें.
हरियाणाचे राज्यपाल असीम कुमार घोष त्या दिसा एमडीयूंत आशिल्ले. ते तीन दिसांच्या दौर्याचेर रोहतक आयिल्ले. त्या दिसा सकाळीं कांय बायलां नितळसाण कर्मचारी एमडीयूंत मात्शीं उसरां पावलीं. तांणी जिवाक बरें दिसना म्हूण पर्यवेक्षक विनोद कुमार आनी वितेंदर कुमार हांकां सांगलें. तांणी तांकां उसरां येवपाचें कारण विचारलें. बरें दिसना, बायलांचें दुयेंस जाल्ल्यान तीं उसरां आयलीं अशें तांणी सांगलें.
हाचेर, पर्यवेक्षक तिडकलो आनी तांणी त्या बायलांक सांगलें, ‘‘तुमी फट मारतात. जर तुमी खरें उलयतात जाल्यार पुरावे दाखयात आनी तुमचे कपडे काडात. पिडेस्त बायलांनी सांगलें, पर्यवेक्षकान एके बायलां कर्मचार्याक तांचे कपडे काडून तांची तपासणी करपाक सांगलें. हाका लागून बायलां कर्मचार्यांक तिडक आयली.
पर्यवेक्षकांचें म्हणणें आयकून बायलां कामगार तिडकल्यो आनी तांणी घडणुके सुवातेरूच बोवाळ करपाक सुरवात केली. ही घडणूक रोखडीच पुराय विद्यापिठांत पातळ्ळी. जेन्ना एमडीयूच्या विद्यार्थी संघटणांक बायलां नितळसाण कर्मचार्यां कडेन पर्यवेक्षकाच्या वागणुकेची म्हायती मेळ्ळी तेन्ना तीय एकठांय आयली आनी तांणी बोवाळ करपाक सुरवात केली.
पर्यवेक्षकाक मारपेट
बायलां कर्मचारी आनी विद्यार्थ्यांनी विनोद आनी वितेंदर ह्या पर्यवेक्षकांक मारपेट करपाचो यत्न केलो, मात विद्यापीठाचे कर्मचारी घडणुके सुवातेर हाजीर आशिल्ले आनी तांणी पर्यवेक्षकाक वाटयले.
कांय वेळान, एमडीयूचे कुलसचीव डॉ. कृष्णकांत गुप्ता आनी कुलगुरू राजवीर सिंह घडणुके सुवातेर पावले. तांणी परिस्थिती समजून घेतली आनी बेगोबेग दोनूय पर्यवेक्षकांक निलंबीत करपाचे आदेश दिले. निलंबन काळांत, ते रोहतकम हांगाच रावतले आनी परवानगे बगर भायर वच्चे नात. कांय वेळांतूच, पुलीस विद्यापीठांत पावले आनी पर्यवेक्षकांक घेवन गेले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
