भांगरभूंय | प्रतिनिधी
हरियाणा, खबरां संस्था: लोकसभा वेंचणुके पयलीं हरियाणात भाजप आनी जननायक जनता पार्टी (जेजेपी) हांची युती तुटल्या. मुख्यमंत्री मनोहर लाल सकाळीं ११.५० वरांचेर चंदीगडच्या राजभवनांत पावले आनी तांणी आपल्या पुराय मंत्रिमंडळाचो राजिनामो राज्यपालां कडेन दिलो. मनोहर लाल आयज सांजेवेळार तिसरे फावट राज्याचे मुख्यमंत्री म्हणून सोपूत घेवपाक शकतात.
जेजेपी फुडारी दुष्यंत चौटाला हांणी मंगळारा सकाळींच तांची सरकारी वाहनां परत केलीं. उपरांत राजकीय वातावरण तापलें.
जागो वाटपा वयल्यान युती तुटली
लोकसभा वेंचणुकेंत जेजेपी हरियाणांत १ ते २ जागांची मागणी करताले, जाल्यार भाजपचे केंद्रीय नेतृत्व आनी राज्य संघटणा सगळ्यो १० जागो स्वता लढपाचे वटेन आसा. हेंच युती तुटपाचें कारण थारलें, अशें थळाव्या सुत्रांनी सांगलें.
जेजेपीचे राष्ट्रीय सरचिटणीस आनी हरियाणाचे उपमुख्यमंत्री दुष्यंत चौटाला हांणी सोमारा दिल्लीक भाजपाचे राष्ट्रीय अध्यक्ष जेपी नड्डा हांची भेट घेतली, मात जागो वाटपाचेर कसलीच चर्चा जावंक ना. दुष्यंत हांणी अमित शहा हांकां परत दिल्लीक मेळपा खातीर वेळ मागल्या. मात ही बसका जातली काय ना हें निश्चीत ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
