हरवळ्यां रंगलो आगळो वेगळो ‘बांगडयांचो फेस्टिवल’

भांगरभूंय | प्रतिनिधी

मुख्यमंत्री डॉ. प्रमोद सावंत हांणी घेतलो वांटो; आदल्या गांव जेवणाचे परंपरेचें नवें रूप

भांगरभूंय । प्रतिनिधी

दिवचलः हरवळेंच्या पुर्वजांनी सांबाळून दवरिल्ल्या दोंगरा वयल्या गांव जेवणाची परंपरा आयचे पिळगेन एके आगळे वेगळे पद्दतीन सांबाळून दवरल्या. सध्या हीच गांव जेवणाची परंपरा हरवळें सांखळे ‘बांगड्यांचो फेस्टिवल’ ह्या नांवान फामाद जाल्या. आयतारा 10 नोव्हेंबराक ही परंपरा व्हडा उमेदीन मनयली.

स्वता मुख्यमंत्री डॉ. प्रमोद सावंत हांणी ह्या फेस्टिवलांत वांटो घेतलो. हे खातीर नवे पिळगेची उमेद आनीक वाडली. पुर्वजांनी सांबाळून दवरिल्ले परंपरेक आयज नवी पिळगी आत्मियतेन बांगड्यांचो फेस्टिवल ह्या नांवान सांबाळटा. एके वेगळे पद्दतीन वनभोजन तशेंच बांगडे परंपरीक पद्दतीन तणांत भाजप, ताचे वेगवेगळे पदार्थ तयार करप ही संकल्पना नवे पिळगे खातीर निश्चीत आकर्शीत करपी आसा, अशें मुख्यमंत्री डॉ. सावंत हांणी ह्या वेळार स्पश्ट केलें.

हरवळेचे पुर्वज आदीं पाडव्याक दोंगरार वचून थंय रांदताले आनी वांगडा जेवताले. उपरांतच्या काळांत हे परंपरेक उणो प्रतिसाद मेळपाक लागलो. ते उपरांत ही परंपरा पुनर्जिवीत करपाचो निर्णय समाज वावुरपी तशेंच आदले पंच संजय नायक हांणी घेतलो. ते उपरांत ही परंपरा आगळे वेगळे पद्दतीन फुडें वचपाक लागली.

ह्या फेस्टिवलांत आवडीच्या बांगड्याचो आस्पाव केलो. हो सुवाळो दिसान दीस व्हड जायत आसा. हो बांगड्यांचो फेस्टिवल सुपाची पूड वाठारांत मनयतात. सुपाची पूड, प्रतापनगर, नवेदार हरवळें वाठारांतले लोक एकठांय येवन बांगड्यांचो फेस्टिवल मनयतात. आदीं हरवळेचे पुर्वज बलिप्रतिपदा ह्या पाडव्या दिसा दोंगराचेर वचून पोळे काडटाले, रांदताले आनी वांगडा बसून जेवताले. ते उपरांत ही परंपरा सोंपपाक पावली. पूण गांवांतलो युवा फुडारी संजय नायक हांणी ही परंपरा नव्या उमेदीन मनोवपाक सुरवात केली. गोंयचे परंपरीक पद्दतीन तणांत भाजिल्ले बांगडे आनी वांगडा उकड्या तांदळाचें शीत, सुंगटांची कडी, चेपणेक घातिल्लीं तोरां असो मेनू ह्या जेवणावळींत आसता. हे परंपरेक खास ‘बांगड्यांचो फेस्टिवल’ अशें नांव दिलां.

आयच्या काळांतल्या भुरग्यांक तणांत भाजिल्ल्या बांगड्यांचे रुचिची कल्पनाच ना. ते खातीर ह्या बांगड्यांच्या फेस्टिवलाची नामना सांखळी वाठारांत वाडटा. हरवळें वांगडाच सांखळी आनी सरभोंवतणचे लोक व्हड संख्येन ह्या सुवाळ्यांत वांटो घेतात. तणांत भाजिल्ल्या बांगड्यांची रूच खंयच्याच व्हड हॉटेलांनी वा घरांत भाजिल्ल्या बांगड्यांक नासता. हे खातीर आमी हे बांगडे घरा बायलां- भुरग्यां खातीर बांदून व्हरतात, अशें गोपाळ सुर्लकार हांणी सांगलें.

बांगडो बरो निवळ करून तातूंत रेशद मलासो भरतात. उपरांत तो हळडीच्या पानांत गुंठलावन तणांत घालून भाजतात. ह्या बांगड्याची रूच लोकांच्या जिबेर घोळटा, हे खातीर सगळ्यांक ह्या बांगड्यांच्या फेस्टिवलाची उमळशीक लागिल्ली आसता. लोक ह्या फेस्टिवलाची वासपूस करीत आसतात आनी फेस्टिवलाक व्हड संख्येन हाजेरी लायतात. तातूंत गांवांतलीं ल्हान बुरगी, तरणाट्यां सयत जाण्टी लेगीत वांटो घेतात. आमच्या पुर्वजांनी सुरू केल्ली ही परंपरा सांबाळून ती फुडले पिळगे कडेन दिवपाचो यत्न आसा, अशें संजय नायक हांणी सांगलें.

50 वयल्यान 800 बांगडे

आमच्या पुर्वजांची परंपरा आमी हातांत घेतली आनी हो बांगड्यांचो फेस्टिवल सुरू जालो. फाटलीं 8 वर्सां आमी ही परंपरा चालू दवरल्या. फक्त 50 बांगड्यांनी सुरू जाल्ल्या ह्या फेस्टिवलाची नामना पुराय सांखळी आनी सरभोंवतणच्या वाठारांत पावल्या. ह्या फेस्टिवलांत येवपी लोकांची
आनी बांगड्यांची संख्या वर्सान वर्स वाडत आसा. हे परंपरे खातीर आतां सुमार 800 बांगडे लागतात, अशें संजय नायक हांणी सांगलें.

दिवाळे उपरांत पयल्या आयतारा बांगड्यांचो फेस्टिवल

आदल्या तेंपार हरवळेचे पुर्वज बलिप्रतिपदा पाडव्या दिसा दोंगराचेर वचून गांव जेवण करताले. पाडव्या दिसा कांय लोकांक आनीक म्हत्वाचीं कामां आसतात. हे खातीर ही परंपरा पाडव्या दिसा चलोवप कठीण जातालें. ते खातीर आतां हो बांगड्यांचो फेस्टिवल दिवाळी जाले उपरांत पयल्या आयतारा मनयतात.