भांगरभूंय | प्रतिनिधी
महाशिवरात्रे निमतान मुख्यमंत्र्यान श्रीरुद्रेश्वर देवळाक दिली भेट
दिवचल: आयज महाशिवरात्र. ह्या उत्सवा निमतान हरवळेंच्या श्रीरुद्रेश्वर देवस्थानांत भाविकांची व्हड गर्दी सकाळ सावनूच आसा. मुक्तपणान अभिशेक करपाची संद मेळिल्ल्यान भाविकांनी मध्यानेर दोन वरां सावनूच गर्दी केल्ली. हांगा भाविकां खातीर बरी वेवस्था केल्ल्याचें देवस्थान समितीन सांगलें.
मजगतीं, मुख्यमंत्री डॉक्टर प्रमोद सावंत हांणी हरवळेंच्या श्री रुद्रेश्वराचें दर्शन घेवन गोंयकारांक बरी भलायकी, आयुश्य मेळचें, गोंयची सेगीत उदरगत जावची अशी प्रार्थना केली. तशेंच तांणी ह्या वेळार देवळाचो वाठार, केंद्र वाठारा नितळ दवरप, सुंदर दवरप, प्लास्टीक मुक्त दवरप हाचेर भर दिवचो, असो उलो मारलो. तशेंच हरवळें पर्यटन वाठार म्हणून विकसीत करतना १७ कोटी रुपया खर्च करून आधुनीक सुविधा दितले. ह्या कामाची बेगीनूच सुरवात जातली अशी म्हायती मुख्यमंत्र्यांनी दिली.
दिवचल म्हालांतल्या वडावल पाळी सुर्ला, कुडणें वाठारांतलो देव गोठणेश्वर, सप्तकोटेश्वर नार्वें, मुळगावचें महादेव मंदीर तशेंच म्हालांतल्या विवीध महादेव मंदिरांत महाशिवरात्रीच्या उत्सवा निमतान हजारांनी भाविकांनी दर्शन घेवन प्रार्थना केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
