भांगरभूंय | प्रतिनिधी
पणजी: दिवचल म्हालांतल्या हरवळें ग्रामपंचायत वेंचणुकेचे फाटभुंयेर वित्त खात्यान (महसूल आनी नियंत्रण) हरवळें ग्रामपंचायत क्षेत्रांत मतदान आनी मतमेजणीच्या काळा मेरेन १९, २० आनी २१ ऑक्टोबर दिसा, तशेंच केपें म्हालांतल्या मोरपिर्ला ग्रामपंचायतीचो वार्ड-६ आनी साश्ट म्हालांतल्या ओर्ली ग्रामपंचायतीचो वार्ड-७ खातीर २० ऑक्टोबर दिसा पोटवेंचणूक जावपाची आशिल्ल्यान सोर्याची विक्री, येरादारी आनी लागीं बाळगुपाचेर निर्बंध लागू केल्यात. वयल्या दिसांनी हरवळे ग्रामपंचायत क्षेत्रांतलीं सगलीं सोर्याचीं दुकानां आनी आस्थापनां बंद दवरपाचो आदेश दिला.
बार्र आनी रेस्टोरंट परवानो आशिल्ल्या आस्थापनांक फकत खावपाचे जिन्नस विकपाक मेळटले आनी तशी सुचोवणी दिवपी बोर्ड लावचे पडटले. बार्र कावंटर बंद दवरचो पडटलो आनी वयल्या दिसांनी सोरो विकपाक मेळचो ना.
मतदार कामगारांक भरपगारी सुटी
हरवळें ग्रामपंचायत वेंचणुके खातीर २० ऑक्टोबर दिसा मतदान जावपाचें आशिल्ल्यान ग्रामपंचायत वार्डांतले मतदार आशिल्ले उद्देगीक कामगार, सरकारी खातीं आनी उद्देगांनी दिसवड्याचेर काम करपी, खाजगी वेपारी आस्थापनांनी काम करपी आनी हेर खाजगी आस्थापनांनी काम करपी सगळ्यां कामगारां खातीर आयतार २० ऑक्टोबर दिसा भरपगारी सुटी जाहीर केल्या. तशेंच दक्षीण गोंयच्या केपे म्हालातल्या मोरपिर्ला ग्रामपंचायतीचो वार्ड-६ आनी साश्ट म्हालांतल्या ओर्ली ग्रामपंचायतीचो वार्ड-७ खातीर २० ऑक्टोबर दिसा पोटवेंचणूक जावपाची आसून वयल्या वार्डांतले मतदार आशिल्ले उद्देगीक कामगार, सरकारी खातीं आनी उद्देगांनी दिसवड्याचेर काम करपी, खाजगी वेपारी आस्थापनांनी काम करपी आनी हेर खाजगी आस्थापनांनी काम करपी सगळ्यां कामगारां खातीर आयतार २० ऑक्टोबर दिसा भरपगारी सुटी जाहीर केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
