भांगरभूंय | प्रतिनिधी
पणजी: लक्झरी गाडयांक सगलें माफ काय कितें? असो प्रस्न पडपा सारकी घडणूक परत एकदां मुखार आयल्या. आयतारा रातीं सुमार पावणेबारांक पणजे फिदाल्गो हॉटेला लागसार एक अपघात जालो. एके ऑडी गाडयेन स्पीडीन येवन चलते गाडयेक धपको दिलो. धपको दिल्ली गाडी वचून एके पार्क केल्ले गाडयेक आदळ्ळी. ती ऑडी हरयाणा पासींग आशिल्ली. ताचीनंबर प्लेट फॅन्सी आशिल्ली. गाडयेचेर ‘एचआर’ जो हरयाणाचो कोड आशिल्लो तो सामको ल्हान बरयल्लो. तशेंच कुशीक व्हडल्या अक्षरान गोवा बरयल्लें. हरयाणाची गाडी गोंयची करपाची ही ट्रीक काय कितें? आनी गोंयचें संबंदीत प्रशासन असल्यो फॅन्सी नंबर प्लेटी आशिल्ल्यो गाडयो राज्यांत भोंवडोवपाक दितात काय? असो प्रस्न परत एकदां उप्रासला.
हे विशीं चड म्हायती प्रमाण आयतारा रातीं पावणेबाराक सुमार हॉटेल फिदाल्गो लागसार एक ऑडी गाडी आनी दोन गाडयां मदीं अपघात जालो. ऑडी गाडयेन १८ जून रस्त्यावेल्यान वचपी गाडयेक धपको दिलो. धपक्या सरशीं ती गाडी घुंवली आनी पार्क केल्ले गाडयेक वचून तेकली. ऑडी गाडी हरयाणाची. एचआर पासींग आशिल्ली. ह्या एचआरा कुशीक गोवा म्हूण व्हडल्या अक्षरांनी बरयिल्लें. आतां गोवा आवडटा म्हूण बरयलां जाल्यार तें नांव हेर कडेन आसपाक जाय आशिल्लें. मात, तें नंबर प्लेटीर आसा.
म्हणटकच हरयाणाची गाडी गोंयची करपाचो हो प्रकार काय? अश्यो कितल्यो गाडयो गोंयांत भोंवता आसतल्यो काय? असो प्रस्न ह्या अपघाता उपरांत उप्रासला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
