भांगरभूंय | प्रतिनिधी
पेडणें: हरमलाच्या सरपंचपदार प्रभाग एकची पंच अनुपमा प्रमोद (हरेश) मयेंकार हांची विरोधाविणें निवड जाली. ह्या वेळार गट विकास खात्याचे भिवा ठाकूर हांणी निर्वाचन अधिकारी म्हणून काम पळयलें आनी पंचायत सचीव सुभाष कांबळी हांणी तांकां सहकार्य केलें. उपसरपंच सोनाली माज्जी, पंच संतान फर्नांडीस, सुशांत गावडे, दिव्या गडेकार, भिकाजी नायक, रजनी इब्रामपुरकार हजर आशिल्ली.
मजगतीं, सरपंचपदार विरोधाविणें निवड केल्ले खातीर सहकारी पंच वांगड्यांचे अनुपमा हांणी उपकार मानले. आमदार जीत आरोलकार हांच्या सहकार्यान पंचायत वाठाराची उदरगत करपाचो आपूण यत्न करतलीं. हाका लागून सगल्यांक विस्वासांत घेवन उरिल्लीं कामां करतली, अशें तिणें मुखार म्हणलें.
ह्या वेळार आदले सरपंच तशेंच आतांचे पंच रजनी इब्रामपुरकार हांणी नव्या सरपंचांक परबीं भेटयलीं आनी, गिरकरवाडा भागांतलो प्रस्न ज्वलंत आशिल्लो. तेन्ना तेन्नाची उपसरपंच अनुपमा मयेंकार हांणी बरो वांगोड दिलो. हाका लागून आमी सगले पंच निश्चीतणान सरपंच मयेंकार हांच्या फाटल्यान रावतले.
रजनी इब्रामपुरकार तशेंच भिकाजी नायक, सांतान फर्नांडीस हांणी आपले विचार मांडले. ह्या वेळार दिलीप वायंगणकार, आदली सरपंच प्रगती प्रमेश मयेंकार, प्रमेश मयेंकार, संजय नायक, प्रकाश रामजी, रघुनाथ रामजी, लिबान फर्नांडीस, हरेश मयेंकार आनी थळाव्यांनी नव्या सरपंचाक परबीं भेटयलीं. ह्या पंचायतीची आदली सरपंच प्रगती मयेंकार हांची ती भावजय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
