भांगरभूंय | प्रतिनिधी
हरमल: गोंय घटकराज्य दिसा निमतान हरमल पंचायत आनी पंचायत संचालनालय हांच्या जोड पालवान मार्केट वाठारांत हरमल नितळसाण आनी जागृताय कार्यावळ आयोजीत केल्ली. सरपंच बर्नार्ड फेर्नांडीस हांणी घटकराज्याचीं सगळ्यांक परबीं भेटयलीं आनी संयोजिका साक्षी टिकर हांणी मार्गदर्शन केलें.
ह्या वेळार नुस्तें बाजारांत नितळसाण केली आनी नुस्तें विकपी बायलांक नितळसाण राखपाची मागणी केली. कोयराचे वायट परिणाम सगळ्यांचेर जाल्ल्यान कॅन्सरा सारकें भिरांकूळ दुयेंस पातळिल्ल्यान एक राखण म्हणून प्लास्टीक जळोवचें न्हय, अशी जागृताय केली.
प्लास्टीक निर्मुलन जावप काळाची गरज आशिल्ल्यान दरेकल्यान प्लास्टीक वापरल्या उपरांत ते खंयसरूय उडयनासतना तें काडून कोयर एकठांय करपी व्यक्तीकडेन दिवचें अशें पंचायत संचालनालयाची साक्षी टिकर हांणी सांगलें.
गांव नितळ दवरपाक सगळ्यांनी सहकार्य करचें असो उलो सरपंच फेर्नांडीस हांणी मारलो.
ह्या वेळार गटविकास खात्याचे भिवा ठाकूर, अजीत धारगळकार, हरमल पंचायत सचीव शेट्ये, संयोजिका साक्षी टिकर, जॉअना अल्वारीस आनी तन्वी प्रभुगांवकार, पंच वांगडी सांतान फेर्नांडीस, सुशांत गावडे, भिकाजी नायक तशेंच पंचायत कर्मचारी प्रमोद गावडे, गोपाळ खवणेकार, मिनीनो माशादो, कोयर वेवस्थापन समितीचे सचीव चंद्रहास दाभोलकार हाजीर आशिल्ले. ह्या वेळार पंचायतीन विवीध आस्थापनांची पळोवणी केली आनी प्लास्टीक कोयर हांगा थंय पातळिल्ल्यान दंडात्मक कारवाय केली. येवपी कांय दीस प्लास्टीक निर्मुलन फेरी आनी दंडात्मक कारवाय मोहीम चालू आसतली, अशें सरपंच बर्नार्ड फेर्नांडीस आनी सचीव शेट्ये हांणी सांगलें.
मजगतीं, नितळसाण कार्यावळी खातीर सरपंच, पंच आनी नागरीक नुस्तें मार्केटांत पावतांच, रस्त्यार बशिल्ल्या नुस्तें विकपी बायलांनी मार्केटांत धांव मारून नुस्तें विकपाक सुरवात केली. ताका लागून नागरीक आनी गिरायकांनी समाधान मानलें आनी सदांच मार्केटांत बसून नुस्तें विकचें अशें तांकां सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
