भांगरभूंय | प्रतिनिधी
98.35 टक्के निकाल: कला आनी वेवसायीक विभागाचो 100 टक्के
हरमल: गोंय शालांत आनी उच्च माध्यमीक बोर्डान घेतिल्ले बारावेचे परीक्षेंत हरमल पंचक्रोशी हायर सेकंडरीचो निकाल 98.35 टक्के लागलो. संस्थेच्या ह्या घसघशीत येसा विशीं आनी उत्कृश्ठ निकालाची परंपरा कायम राखिल्ले खातीर संस्थेचे चेअरमन तशेंच आदले मुख्यमंत्री लक्ष्मीकांत पार्सेकार हांणी गुणेस्त विद्यार्थी आनी शिक्षकांक परबीं भेटयलीं.
अंदूचे परीक्षेंत विज्ञान, कला, वाणिज्य आनी वेवसायीक विभागांत मेळून 364 विद्यार्थी परीक्षेक बशिल्ले. तांतले 358 विद्यार्थी पास जाले. विज्ञान फाट्यांत 88 तले 84 पास जावन निकाल 95.45 टक्के लागलो. हातूंत 22 विशेश प्राविण्य, 74 पयलो वर्ग आनी 11 विध्यार्थी पास श्रेणीत, जाल्यार कला फाट्यांत 104 तले 104 पास जावन 100 टक्के निकाल लागलो. हातूंत 29 विशेश प्राविण्य, 51 पयली श्रेणी, 24 दुसरे श्रेणीत, वाणिज्य फाट्यांत 88 तले 84 पास जावन 95.45 टक्के निकाल लागलो. हातूंत 7 विशेश प्राविण्य, 55 पयले श्रेणी आनी 22 दुसरे श्रेणींत, जाल्यार वेवसायीक विभागांतल्या दोनूय फाट्यांत 100 टक्के निकाल लागलो. हातूंत सी आर एम फाट्यांत 52 तले 52 पास जाले. हातूंत 50 विशेश प्राविण्य आनी 2 पयल्या वर्गात, तशेंच एफ डी एम विभागांत 11 तले 11 पास जाले. हातूंत 9 विशेश प्राविण्य आनी 2 पयल्या वर्गांत पास जाले.
संस्थेचे हायस्कूल, उच्च माध्यमीक आनी कॉलेज विभागांतलो अध्यापक वर्ग हे संस्थेचो घटक आशिल्ल्यान सहकार्य करीत आसता. हाचो परिणाम उत्कृश्ठ निकालांत जाता. हे संस्थेंत पेडणें, बार्देस तशेंच म्हाराष्ट्र राज्यांतले विध्यार्थी प्रवेश घेतिल्ल्यान ताचो पालकांक अपेक्षीत निकाल दिवपा खातीर संस्था दरवर्सा वावुरता अशें चेअरमन पार्सेकार हांणी सांगलें.
ह्या वेळार हायर सेकंडरीची मॅनेजर तशेंच हायस्कुलाची मुख्यध्यापिका स्मिता पार्सेकार, हायरसेकंदरी प्राचार्य गोविंदराज देसाय, कॉलेजचे प्राचार्य उदेश नाटेकार, विज्ञान विभाग मुखेली प्रा. श्यामला रेडकार, वेवसायीक विभाग मुखेली प्रा. शांभवी नायक पार्सेकार, प्रा. अतूल नायक हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
