भांगरभूंय | प्रतिनिधी
पणजी ः हरमल दर्यादेगेर ज्या शॅका भायर खून जाल्लो तो शॅक मोडपाचो आदेश पर्यटन खात्यान काडला. हो शॅक दुसऱ्याक दिवन शॅक धोरणाचें उल्लंघन केल्ल्यान शॅकाचो मूळ धनी मान्यूएल फर्नांडीस हाका पर्यटन खात्यान 25 लाखांचो दंड घाला.
दर्यावेळेर चलतना एका शॅका मुखार दवरिल्ल्यो कदेली चलप्याक लागच्यो न्हय म्हूण अमर बांदेकारान (37) सहज भितरल्यो दोन कुशीक काडून दवरल्यो. इतल्याच कारणा वेल्यान शॅक कामगारांनी ताचे कडेन वाद घालो. मागीर झगडीं जालीं आनी उपरांत मारामारी. तातूंत अमराचे तकलेक खर जखम जाली आनी ताका मरण आयलें.
मेळिल्ले म्हायती प्रमाण, हरमल दर्यादेगेर उबारिल्लो शॅक क्रमांक 4 हो मान्यूएल फर्नांडीस हाचो आसा. दोन दिसां आदीं घडिल्ले घडणुके उपरांत पर्यटन खात्यान उल्लेख केल्ल्या शॅकाच्या कागदपत्रांची तपासणी केली. तेन्ना तांतूत मान्यूएल फर्नांडीस हांणी तो शॅक दुसऱ्याक चलोवंक दिल्ल्याचें कळ्ळें. गोंयांत शेंकड्यांनी वेवसायीकांनी अशे शॅक्स, दुकानां, गाळे, स्टाॅल आपल्या नांवाचेर घेवन दुसऱ्यांक चलोवपाक दिल्यात. कांय कडेन धनया कडल्यान भाड्यान घेतिल्लें दुकान तिसऱ्याकूच चलोवपाक दिवपाचेय प्रकार घडल्यात. राज्यांतल्या मार्केटांनी हें पळोवंक मेळटा.
शॅक आपल्या नांवार घेवन दुसऱ्याक दिवप हें शॅक धोरणाच्या कलम 20 चें उल्लंघन आसा. हाचेर पर्यटन खात्यान कारवाय करून मान्यूएल फर्नांडीस हाका 25 लाख रुपया दंड घालून फुडल्या 7 दिसां भितर तो शॅक मोडपाचो आदेश दिला. 7 दिसां भितर उल्लेख केल्लो शॅक मोडपाक शकलो ना जाल्यार खाते स्वता खर कारवाय करतली आनी सगलो खर्च फर्नांडीसा कडल्यान वसूल करतले. शॅक वांटपा खातीर जावपी पावणेंत वांटो घेवपाचेरूय ताचेर बंदी घाल्या अशें पर्यटन खात्यान जारी केल्ल्या आदेशात म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
