भांगरभूंय | प्रतिनिधी
बोरवॅली बंद करपाचो थाराव; महसूल वाडोवपाची लोकांची सुचोवणी
भांगरभूंय । प्रतिनिधी
हरमलः हरमला उदकाची समस्या गंभीर जाल्या. बोरवॅलींची संख्या वाडिल्ल्यान बांयो आंटल्यात. शिंपणावळ खात्याची परवानगी घेनासतना, व्हड प्रमाणांत बोरवॅली मारल्यात. बेकायदो आनी व्हड आकाराच्यो वोरवॅली बंद करपाचो थाराव हरमल ग्रामसभेंत घेतलो. तेचवरी म्हादय रानवटी जीव वाठार आशिल्ल्यान अभयारण्य आरक्षीत करपाचो थाराव महेश वायंगणकार हांणी मांडलो आनी तो भोवमतान मंजूर केलो.
हरमल पंचायतीची ग्रामसभा सरपंच बेर्नाड फर्नांडीस हांचे अध्यक्षते खाला जाली. पंचायत सचीव सुनील शेट्ये हांणी फाटले सभेचें इतिवृत्त वाचून दाखयलें आनी तें मंजूर केलें. उदकाचो प्रस्न गंभीर जावपाक वोरवॅली कारणीभूत आसात. तांकां कोणे परवानगी दिली, असो प्रस्न संजय नायक हांणी उपस्थीत केलो. तशेंच बेकायदो बोरवॅली बंद करच्यो, अशी मागणी केली. ताका जाप दितना सरपंच फर्नांडीस हांणी सांगलें, बोरवॅल मारपाक खातें परवानगी दिता. ताका पंचायत आडावपाक शकना.
पंचायत वाठारांत कितलीशींच हॉटेलां, रॅस्टोरंण्ट आनी हेर आस्थापनां आसात. तांचे कडल्यान कर घेनाशिल्ल्यान पंचायतीक लुकसाण जाता. पंचातीन कर वसुली करची आनी महसूल वाडोवचो, अशें महेश वायंगणकार हांणी सांगलें.
सुको कोयर एकठांय करपाचें कंत्राट बेकायदेशीरपणान चलता. ताची चवकशी जावपाक जाय. कंत्राटाचें नुतनीकरण करतना कसल्यो अटी घातिल्ल्यो, अशें महेश वायंगणकार आनी रुपेश नायक हांणी विचारलें. तशेंच कंत्राटदाराक रस्त्या कुशीचो कोयर एकठांय करपाक सांगचें, अशें सुचयलें.
ह्या वेळार जैवविविधता समितीच्या सचीवपदार मेलवीन डिसोझा हांची एकमतान निवड केली.
पार्सेकार वाड्या वयले शाळे लागसारचो पांयपूल, वयलोवाडो- आड्यांत रस्त्यांचीं कामां, गिरकरवाडो पांयपूल, पंचायत घराची दुरुस्ती, रस्त्या कुशीचीं गटारां हीं कामां पुराय करपाची लोकांनी सुचोवणी केली.
ह्या वेळार आदले सरपंच इनासियो डिसोझा, मार्सेलीन फर्नांडीस टोनी डिमेलो, एडवीन डिसोझा, आदले सरपंच रामचंद्र केरकार, डॉमनीक फर्नांडीस, रामकृष्ण माज्जी हांणी चर्चेंत वांटो घेतलो. ह्या वेळार उपसरपंच दिव्या गडेकार, पंच अनुपमा मयेंकार, सोनाली माज्जी, सांतान फर्नांडीस, गुणाजी ठाकूर, भिकाजी नायक, रजनी इब्रामपूरकार तशेंच गटविकास खात्याचे सुनील पालयेंकार निरिक्षक म्हूण हाजीर आशिल्ले. पंच भिकाजी नायक हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
