भांगरभूंय | प्रतिनिधी
हरमल: मांद्रें मतदारसंघांतल्या चोपडें ते केरी रस्त्याच्या रुंदीकरण जावपी मार्गाक मंजुरी मेळिल्ली आसून 43 कोटी रुपया खर्च करून जावपी रस्त्याची पळोवणी केली. हरमल ते केरी व्हाया पालयें रस्त्याची आमदार जीत आरोलकार हांणी दोनूय सरपंच आनी पंच वांगड्यां सयत पळोवणी केली.
तांचे बरोबर उपजिल्होधिकारी शिवप्रसाद नायक, भौशीक बांदकाम खात्याचे अभियंते शिवनाथ गवस, वीज खात्याचे अभियंते रामानंद नायक, रान खात्याचे अधिकारी अनील केरकार तशेंच हेर अधिकारी हाजीर आशिल्ले.
ह्या वेळार हरमलच्यो सरपंच रजनी इब्रामपूरकार, पंच सोनाली माज्जजी, संतान फर्नांडीस, सुशांत गावडे, पालयेंच्यो सरपंच स्नेहा गवंडी, पंच सागर तिळवे, राधा परब, संदीप न्हानजी तशेंच मगो गट आदले अध्यक्ष तशेंच आदले पंच प्रवीण वायगंणकार आनी नागरीक हाजीर आशिल्ले. ह्या रस्त्याचें काम केंद्रीय रस्तो निधींतल्यान जातलें. रस्तो मार्गांतल्या जमीनदार नागरिकांनी सहकार्य करचें. ह्या वाठारांतलीं उदकाचीं पायपां, केबल आनी हेर गजालींचेरूय चर्चा केली.
कितल्याश्याच वर्सां उपरांत ही संद आयिल्ली आसून फुडल्या सुमार वीस वर्सांची गरज वळखून रुंदीकरणाक सहकार्य करपाचें आवाहन आमदार जीत आरोलकार हांणी केलें.
ह्या वाठारांत पर्यटन विकास थळां प्रक्षणीय आसून पर्यटकांची गर्दी वाडल्या. पूण रस्त्याची गरजेची सुविधा उणी पडत आशिल्ल्यान रस्त्याचें रुंदीकरण जावप गरजेचें आसा. तिठो वाठारांतल्या पिंपळा पेड आनी हेर फातराचे दुरीग आनी दुकानांचे कांय भाग कुशीक काडून रस्तो निर्धोक पद्दतीन जातलो अशें आमदार जीत आरोलकार हांणी म्हणलें.
ह्या रस्त्याची 2002 सावन रुंदीकरण प्रक्रिया सुरू आसा. सरकारान जमनीचो मोबदलो दिला. पूण उपरांत कांय जाणांनी केल्लें अतिक्रमण नेमा भायर आशिल्ल्यान तांणी आपखोशयेन तें कुशीक काडून लुकसाण टाळचें अशें अभियंते गवस हांणी सांगलें.
ह्या मार्गाचें काम गतीन पुराय करपा खातीर सरकाराक सहकार्य करचें आनी रस्त्याचे लागीं आशिल्ल्या आस्थापन धनयांनी तेंको दिवचो अशें उपजिल्होधिकारी नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
