भांगरभूंय | प्रतिनिधी
पणजी : हरमल दर्यादेगेवेल्या सकयलो वाडो वाठारांतल्या एका शॅकाक शेनवरा उजो लागलो. हातूंत हें खाजगी शॅक पुरायेन लासलें. वेवसायिकांचें सुमार १५-२० लाख रुपयांचें लुकसाण जालां. पर्यटन हंगामांतूच ही घडणूक घडिल्ल्या थळाव्या वेवसायिकाक अर्थीक नदरेन बरेच लुकसाण सोंसचें पडलां. ह्या उज्याचें नेमकें कारण आजूनय स्पश्ट जावंक ना. तरी शॉर्ट सर्किटाक लागून हो उजो लागला आसतलो असो अदमास उक्तायला.
सकाळच्या सुमार ३.२० वरांचेर थळाव्यांनी हे घडणुकेची म्हायती थळाव्या आमदाराक दिली. म्हायती मेळटांच आमदार १५ मिनटांनीच घडणुके सुवातेर पावले. तांणी रोखडेंच उजो पालोवपी दळ आनी पुलिसांक संपर्क करून वेगान मजत केली. तशेंच तांणी मुख्यमंत्री डॉ. प्रमोद सावंत हांकांय हे घडणुकेची म्हायती दिली. थळावे नागरीक, आमदार आनी उजो पालोवपी दळाच्या जवानांच्या येत्नान सकाळीं सुमार ५ वरां मेरेन उज्याचेर नियंत्रण मेळयलें.
ह्या उज्यांत शॅकातलें फर्निचर, इलेक्ट्रॉनीक उपकरणां आनी हेर सामान लासून गोबोर जाल्ल्यान वेवसायिकांचें व्हड अर्थीक लुकसाण जालां. पुलीस आनी उजो पालोवपी दळा वतीन उजो कसो लागलो हाचो तपास सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
