भांगरभूंय | प्रतिनिधी
पणजी : गोंय पुलिसांच्या गुन्यांव फांट्यान बुधवारा हरमला व्हिसा आनी पासपोर्टा बगर रावपी रशियन नागरिकाक अटक केली. ‘ऑपरेशन फ्लशआवट’ खाला ही कारवाय केल्ल्यान, गोंयांत बेकायदेशीरपणा रावपी विदेशी नागरिकांचो सोद घेवपाक पुलिसांनी हें विशेश अभियान राबयलें.
गुन्यांव फांट्याचे पुलीस निरीक्षक नितीन हळर्णकार हांच्या पंगडान पेडणें म्हालांतल्या हरमल वाठारांत सोद मोहीम राबयली. हातूंत गिरकरवाडो, हरमलच्या ख्रिसपेरिओ डिसोझा हांगा रावपी इव्हगेनी शेलोपुखो (४०) हो रशियन नागरीक मेळ्ळे. ताचे कडेन पासपोर्ट, व्हिसा वा हेर कसलेच वैध प्रवासी कागदपत्रां नाशिल्ल्याचे पुलीस तपासांत स्पश्ट जालें.
ह्या प्रकरणांत गुन्यांव फांट्यान १९४८ च्या ‘फॉरेनर्स ऑर्डर’, १९५० च्या ‘पासपोर्ट एन्ट्री इंटु इंडिया रूल्स’ आनी १९२० च्या ‘पासपोर्ट एन्ट्री क्ट’ खाला गुन्यांव नोंद केला. काल सांजेवेळार ५.४० वरतांचेर सर्वोच्च न्यायालयाचीं सगलीं मार्गदर्शक तत्त्वां पाळून आरोपीक अटक केली. तशेंच ताचे अटकेची म्हायती पणजेच्या परराष्ट्र प्रादेशीक नोंदणी कार्यालया वरवीं रशियन दुतावासाक कळयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
