भांगरभूंय | प्रतिनिधी
दुसऱ्या दिसा तीन बांदकामां मातये भरवण
भांगरभूंय । प्रतिनिधी
पेडणें: हरमल दर्यादेग वाठारांत सीआरझॅड कायदो मोडून 200 मिटरां भितर जीं बांदकामां केल्लीं, तांचेर सीआरझॅड विभागान 17 सप्टेंबराच्यान कारवाय सुरू केल्ली. दुसऱ्या दिसाय ही कारवाय चालू दवरून तीन बांदकामां मोडलीं.
वट्ट 15 बांदकामांचेर कारवाय करपाचो आदेश सीआरझॅड विभागा वतीन दिल्लो. ते प्रमाण पंचायत संचालकान लेगीत पंचायतीक कळोवन त्या बांदकामांचेर कारवाय करपाची सुचोवणी केल्ली. तीं बांदकाम मोडचे कातीर उत्तर गोंय जिल्होधिकाऱ्या कडल्यान पुलीस बंदोबस्त मंजूर करून संबंदीत विभागान बांदकामां मोडपाक दिवपाचो आदेश दिलो. ते प्रमाण हरमल दर्यादेग वाठारांतल्या सीआरझॅड नेम मोडून केल्ल्या 15 बांदकामांतलीं 17 सप्टेंबराक 4 आनी 18 सप्टेंबराक 3 मेळून वट्ट सात बांदकामां मोडलीं. उरिल्ल्या 8 बांदकामाचेर लेगीत अशीच कारवाय जातली. पूण कांय थळाव्या संबंदीत बांदकाम वेवसायिकांनी आपापलीं बांदकामां स्वता जावन मोडपाक फुडाकार घेतिल्ल्याचें चित्र ह्या वाठारांत दिसता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
