भांगरभूंय | प्रतिनिधी
पेडणेंः हरमला दर्यादेगेर स पर्यटकांनी थळाव्या नुस्तेमाराक मारपेट केल्ल्याची गंभीर घडणूक उजवाडाक आयल्या. एका बोटीची सुवात बदलपा वेल्यान जाल्लो ल्हानशा वादाचे रुपांतर गाळयो आनी मारबडयत जालें. ह्या प्रकरणांत मांद्र्यां पुलिसांनी महाराष्ट्रांतल्या स जाणांचेर गुन्यांव नोंद करून तांचे आड कारवाय सुरू केल्या. आरोपींतल्या दोगांक थंयच अटक केल्या, जाल्यार उरिल्ल्या चार जाणांक कोल्हापूरां अटक केली.
ही घडणूक 3 जूनाक सुमार सांजेच्या 6 वरांचेर घडली. खालचोवाडो – हरमलाचो लॉरेन्स फर्नांडीस (40) आपली बोट सावळेंत व्हरपा खातीर कुशीक व्हरपाचो यत्न करतालो. पूण बोटी लागसार बशिल्ल्या कांय पर्यटकांनी सुरवेक ह्याच कारणावेल्यान लॉरेन्स हांचे कडेन वाद घालो. उपरांत गाळयो घाल्यो आनी ताचेर हल्लो केलो. सौरभ वाळेकर (24) आनी सागर झळके (25) ह्या दोगांयनी ताका मारपेट केली आनी जिवेशी मारपाची धमकी दिली असो आरोप लॉरेन्स फर्नांडीसान कागाळींत केलां.
हे कागाळीचेर आदारून मांद्र्यां पुलिसांनी 4 जूनाक संबंदीत आरोपींचेर गुन्यांव नोंद केलो. उपरांत सौरभ वाळेकार आनी सागर झळके हांकां घडणूक सुवातेवेल्यान अटक केली. पूण हेर चार आरोपी पळून गेले. तांचो सोद घेवपाक पुलिसांनी एक पंगड धाडलो. पुलिसांनी तपास करुन कृष्णात वायगडे (कोल्हापूर), राजेंद्र रावळ (हुपरी), कृष्णनाथ वायगडे (हुपरी) आनी शिवानंद भंडारी (हुपरी) हांकां कोल्हापूरा ताब्यांत घेतले. तशेंच आरोपींनी पळून वचपा खातीर वापरिल्ली गाडी पुलिसांनी जप्त केल्या. हे घडणुकेक लागून हरमल वाठारांत तिडकीचे वातावरण निर्माण जाला. थळाव्या नुस्तेकारांनी आनी नुस्ते वेपाऱ्यांनी हे घडणुकेचो निशेध केला आनी थळाव्या लोकां कडेन वेव्हार करतना पर्यटकांनी संयम दवरचो अशी मागणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
