हरमला खून जाल्ले शॅक मोडून उडोवपाचे आदेश

भांगरभूंय | प्रतिनिधी

-परस्पर दुसऱ्यांक चलोवपाक दिवपी शॅक धनयांचेर जातली कारवायः खंवटेपणजीः हरमल दर्यादेगेर ज्या शॅकांत खुन जाल्लो त्या शॅक धनयाचेर पर्यटन खात्यान बडी मारल्या. पर्यटन खात्यान दिल्ले शॅक परस्पर दुसऱ्यांक चलोवंक दिल्ल्या कारणान हे शॅक मोडून उडोवपाचो आदेश पर्यटन खात्यान धनयांक दिला. ते भायर खात्यान 25 लाखांचो दंडूय केला. ते भायर शॅक धनी आनी तंत्रगिन्यानाचे मजतीन ज्या धनयांनी शॅक चलोवपाक दिल्यात तांचेर कारवाय करपाची मोहीम चालीक लावपाचे पर्यटन मंत्री रोहन खंवटे हांणी सांगलें.

हरमल दर्यादेगेर पासय मारतना अमर बांदेकार ह्या 28 वर्सा पिरायेच्या तरणाट्याचो शॅकार आसपी कामागारांनी खून केल्लो. ह्या प्रकरणांची चवकशी करतना मांन्द्रें पुलिसांक दिसून आयले, शॅक धनी मॅन्युएल फर्नांडीस हांणी हे शॅक दुसऱ्याक चलोवपा खातीर दिल्या. उपरांत हे विशीं सविस्तर अहवाल मांन्द्रें पुलिसांनी 72 जानेवारीक पर्यटन खात्याक सादर केल्लो.

खात्यान दिल्ले शॅक परस्पर दुसऱ्याक चलोवप दिवप हे गोंय राज्य तात्पुरते शॅक पुलिसांच्या कलम 20 चें उल्लंघन जाता. देखून पर्यटन खात्यान शॅक धनी फर्नांडीस हांचेर कारवाय करपाचे थारायला. प्रकरणाची गंभीर दखल घेवन खात्यान धनयाक 25 लाखांचो दंड भरपाक सांगला आनी शॅकाच्या वांटपा वेळार जी सुरक्षा ठेव सरकारी तिजोरीत धनयान दवरिल्ली ती लेगीत जप्त केल्या.

तशेंच फर्नांडीस हांकां दिल्लें शॅकाचें लायसन्स रद्द करून ताचे शॅक क्र. 4 सात दिसा भितर मोडून उडोवपाचो आदेश दिला. जर हे मोडपाक धनी अपेसी थारल्यार खातें स्वता हें शॅक मोडटले आनी ताचो खर्च धनया कडल्यान वसूल करतले, अशी शिटकावणी दिल्या. ते भायर फर्नाडीस हांकां काळ्या वळेरेत घालून, फुडारांत जावपी शॅक वांटप प्रक्रियेंत वांटेकार जावपांक बंदी घातल्या.

जेन्ना हे शॅक भाड्याक दितात तांची कागदपत्रां तयार जायनात. देखून आमकां कारवाय करपाक आडमेळी येताल्यो. आतां तंत्रगिन्यानाचे मजतीन फुडल्या पांवड्यार वचून सगळ्या शॅकांचेर पाळत दवरतले.

तशेंच पर्यटन खात्याच्या संचालकाक कारवाय सुरू करपाचे आदेश दिवन हो वेवसाय नियंत्रीत करपाक सांगला, अशी म्हायती मंत्री रोहन खंवटे हांणी दिली.

शॅक संघटणेक वांगडा घेवन तांकां जाय तशें शॅक धोरण तयार केले, कसल्यो आडमेळी नासतना बरो वेवसाय जावचो म्हूण कायदो हाडलो. पूण ही शॅका परस्पर भायल्यांक चलोवपाक दिवची न्हय ही आमची अट आशिल्ली. अंदूंच्या हंगामांत इतिहासांत पयलेच खेपे हंगाम सुरु जावचे पयलीं आमी शॅकाचें वांटप करून शॅका तयार करून दिली. देखून जांकां शॅकांचें वांटप जाला तांणीच ही शॅका चलोवपाची ही धनयांची जापसालदारकी आसा, अशें मंत्री रोहन खंवटे हांणी सांगलें.

हीच खंत गोंय शॅक धनी संघटणेन उलोवन दाखयला आनी जे भशेन गोंयचें नांव पेड्ड्यार जाता हाचो तांकां पश्चाताप जाला. भायल्या लोकांक गोंयचें पडिल्लें ना. फकत बेगीन पयशे जोडपाक सोदतात. ताका लागून अश्यो घडणुको घडटात. ही आमची मोहीम अशीच चालू आसतली. तुमका शॅका चलोवपाची ना जाल्यार भायर सरात, वेटींग लिस्टार खूप जाण आसात. तांकां संद दियात. हाव विरोधक आनी हे आमदारां कडेन मागता, ह्या प्रकरणाक राजकी रंग दिवचो न्हय, असो उलो खंवटे हांणी मारला.

आमकां मजत करपा खातीर शॅक संघटणेन उतर दिलां, खात्याक सांगला. तंत्रगिन्यानाचें मजतीन कोणेच शॅक भायल्याक दिल्यात हे सोदून काडात आनी तांका धोरणा प्रमाण 25 लाख दंड करात. उत्तर ते दक्षीण गोंय मेरेन शॅकांचें मॅपींग चालू जाला. बेगिनूच ही मोहीम सुरू जातली. शॅक धनयांनी सहकार्य करचे. जे कोण कायदेशीर शॅक चलयतात तांकां कसलोच त्रास जावचो ना, अशें खंवटे हांणी सांगलें.