भांगरभूंय | प्रतिनिधी
हरमलः दर्यादेग वाठारांतलो पर्यटन मोसम उलगलो. पर्यटक आपल्या घरा वचपाचे वाटेक लागल्यात. उबाळ सोंसू नजे इतलो वाडलो म्हण्टकच पर्यटक थंड हवेचे सुवातेचेर वचपाक लागतात. ताका लागून हरमल दर्यादेग वाठारांतल्या वेवसायिकांनी ‘पॅक अप’ सुरू केलां. मात पर्यटन खात्याच्या धोरणांत बदल करपाक जाय, उण्यांत उणें थळाव्यांचो आस्पाव करचो, अशी तांणी मागणी केल्या.
ह्या वाठारांत सादारण सप्टेंबरांत मोसम सुरू जाता. चवथी उपरांत वेवसायीक पर्यटन मोसमा खातीर सज्ज जातात. पर्यटन मोसम म्हणल्यार थळाव्या वेवसायिकां खातीर पोटापाण्याचें साधन, मात सध्या थळावे वेवसायीक सरकारी धोरणाचे बळी थारतात. ताका लागून हो वेवसाय करप कठीण जाला, अशें एका वेवसायिकान सांगलें. फुडारांत थळाव्यांक कुशीक दवरून पर्यटन धोरण निश्चीत केल्यार अजाप दिसचें ना, अशें आनीक एका वेवसायिकान सांगलें.
अंदूं सोंपिल्ल्या मोसमांत शॅक वेवसायिकांक सरकारी धोरणाचो मार बसलो. दोन शॅकां मदीं थारावीक अंतर आसचें अशें धोरणांत म्हणलां, पूण ताची अंमलबजावणी मात जावंक ना. एकामेकांक तेंकून शॅक उबारिल्ले. ताचे जाब विचारपी वेवसायिकाक सतावपाची संद खात्या कडेन आसता. ताका लागून वरिश्ठ पांवड्याचेर ‘बॉस’ तयार जाल्ल्यान धोरणाचे बारा बिरेस्तार आनी तेरा शुक्रार जाल्ल्याचें अंदूं दिसलें. खात्यांतले कर्मचारी सुबेसपणा करतात, ताका लागून वरिश्ठ लोकांचें नांव पेड्डेर जाता. तातूंत कार्यक्षम अधिकाऱ्याचें नांव घाण जाता, अशें कांय वेवसायिकांनी सांगलें. हालींसराक ‘गॉडफादर’ हें परवलीचें उतर जालां. दरेके बेकायद गजालींत हें उतर आशिल्ल्यान थळाव्या वेवसायिकांक आदार उरूंक ना. आदीं थळाव्या पांवड्याचेर हीच प्रथा चलताली आनी तांकां परिणाम भोगचे पडटाले. मात आयज वरिश्ठ पांवड्याचेर गॉडफादर आशिल्ल्यान थळाव्यांचें शाणपण चलना. सध्याचे स्थितींत थळावे वेवसायीक सर्तींतल्यान भायर पडटलें, हें निश्चीत. चड वजनाच्यो सुटकेसी राजकारण्यांक आवडटात, ताका लागून सर्वसामान्य लोकांक कितें दिसता, हाचें राजकारण्यांक पडून गेल्लें ना, हो इतिहास आसा, अशें उबगिल्ल्या एका वेवसायिकान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
