भांगरभूंय | प्रतिनिधी
पेडणें: हरमल ग्रामसभेंत पंचायत सचिवाच्या कामकाजाचेर तिडक उक्तायत सचीव सुभाष कांबळी हांची बदली करपाची नेटाची मागणी ग्रामस्थांनी केली. सचीव वायट वागतात, योग्य म्हायती दिनात आनी ग्रामसभेंतले थाराव इतिवृत्तांत घेनात अशे आरोप ग्रामस्थांनी केले.
ग्रामस्थ मार्सेलीन फर्नांडीस हांणी मधलोवाडो वाठारांत ’हर घर जल’ येवजणेचे फाटले ग्रामसभेंत जाल्लो थाराव इतिवृत्तांत घेवंक नाशिल्ल्या तिडक उक्तायली. एडवीन डिसुझा हांणी सचीव ग्रामस्थांच्या प्रस्नांक जाप दिवपा कडेन आडनदर करता असो आरोप करीत बदलीची मागणी केली. एडविन डिसुझा हांणी सचिवाच्या बदलीचो थाराव मांडलो आनी तो संमतूय जालो.
‘हर घर जल’ येवजणेचेर चर्चा
पिवपाच्या उदकाचो मुद्दो हजर करीत मार्सेलीन फर्नांडीस हांणीं बांय आनी झरीचें उदक तपासपाची मागणी केली. भलायकी खात्याचे तपासणे खातीर पत्र बरोवपाचें आस्वासन ह्या वेळार सरपंचान दिलें.
अनधिकृत बांधकाम आनी कोयर वेवस्थापन
पंचायत मळार सुरू आशिल्ल्या अनधिकृत बांधकामाचेर ग्रामस्थांनी तिडक उक्तायली. भौशीक बांधकाम खात्याच्या अधिकार्यां कडेन उलोवन ग्र्रामस्थांची बसका घेवपाची मागणी केली. कोयर वेवस्थापना विशींय चर्चा जाली. कांय सुवातांचेर गांवचेच लोक कोयर हाडून उडयतात अशी कागाळ टोनी डिमेलो हांणी केली. कॅमेरे बसोवन दोशींचेर कारवाय करपाचो थाराव संमत केलो. तशगंच अरुंद रस्त्यांक लागून कोयर पेटीची वेवस्था करपाचें थारलें.
विकासकामां आनी निधीची म्हायती
पंचायती कडेन आशिल्ल्या १४ व्या वित्त आयोगाच्या १६ लाखांचो निधी परत धाडटले अशें सांगले उपरांत ग्रामसभेंत असमाधान उक्तायलें. मात हो निधी प्रशासकीय मंजुरीचो आशिल्ल्यान तो वापरप शक्य नाशिल्ल्याचें स्पश्ट केलें. येवपी काळांत ५८ लाखांचीं उदरगतीचीं कामां हातांत घेतले अशें सरपंचान सांगलें.
मुख्यमंत्र्यांच्या निर्णयाक येवकार
बेकायदेशीर बांधकामां नियमीत करपाचो आनी घर दुरुस्तीक रोखडेच परवाने दिवपाच्या मुख्यमंत्री निर्णयाक येवकार दिलो. ग्रामसभा सरपंच अनुपमा मयेंकार हांचे अध्यक्षते खाला जाली. ह्या वेळार उपसरपंच, पंच वांगडी आनी गटविकास अधिकारी हजर आशिल्ले. उपकार पंच भिकाजी नायक हांणी मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
