भांगरभूंय | प्रतिनिधी
आशियायी खेळांत भारताच्या हॉकी पंगडान भांगरा पदक जिखपाक येस आयलें. हें येस पळोवन भारताचो आदलो म्हान फॉरवर्ड खेळगडो धनराज पिल्लेक 1998चो उगडास जालो. तशेंच ताणें मुखेली हरमनप्रीत सिंगाची तोखणाय करतना ताका हॉकी खेळांत महेंद्रसिंग धोनी म्हणलो.
भारतान फायनलींत जपानाक 5-1 अशा फरकान हारोवन भांगरा पदक जिखिल्लें. तशेंच ह्या जैतान भारत फुडल्या वर्सा जावपी पॅरीस ऑलिम्पिका खातीर थेट पात्र जालो.
1998त बॅंकॉक आशियायी खेळांत भारतान भांगरा पदक जिखिल्लें. त्या वेळार धनराज पिल्ले मुखेली आशिल्लो.
भारतान चारूय क्वॉर्टरांनी आपलो शेक दवरतना उत्कृश्ट प्रदर्शन केलें. फायनलींत 5-1 अशा व्हडा फरकान जिखप तितलें सोंपें नासता. फाटले खेपे जपानान आमकां हारयिल्लो. ताचो बदलो पंगडान घेतलो अशें पिल्लेन मुखार म्हणलें.
चार ऑलिम्पिकांनी, चार संवसारीक सर्तींनी, चार आशियायी खेळांनी आनी चार चॅम्पियन्स ट्रॉफींनी खेळपी 55 वर्सां पिरायेच्या पिल्लेन होंगझोउ आशियायी खेळांत सगल्यांत चड 13 गोल करपी हरमनप्रीत सिंगाची लेगीत तोखणाय केली. जैताचें स्रय हरमनप्रीत सिंगाच्या फुडारपणाक लेगीत वता. तो भारतीय हॉकीचो महेंद्रसिंग धोनी आसा. तो आपलें योग्य रितीन काम करता तशेंच फाटीं रावन खेळगड्यांक योग्य रितीन मार्गदर्शन करीत रावता. कितलेंय चेपण आयलें तरी तो शांत आसता अशें पिल्लेन मुखार म्हणलें.
पी आर श्रीजेश, मनप्रीत सिंग, ललित उपाध्याय आनी रोहिदास अमित ह्या सिनीयर खेळगड्यांनी बरे तरेन ताळमेळ राखलो. फायनल मॅच पळयतना आपल्याक 1998ची याद जाली अशें पिल्लेन म्हणलें.
1998चे आशियायी खेळाचे फायनलींत भारतान दक्षीण कोरिया पंगडाक पॅनल्टी शुटआवटांत 4-2 अशा फरकान हारयिल्लो. कोरियान आघाडी घेतल्या उपरांत निर्धारीत खेळाच्या वेळांत धनराज पिल्ले गोल करून भारताक बरोबरी मेळोवन दिल्ली.
1998त आपले कडेन ह्या पंगडा भशेन घटमूट पंगड आशिल्लो. आशीष बलाल आनी एबी सुबैया सारके अणभवी गोलकीपर आशिल्ले. फुलबॅकांत लाजरुस बारला, दिलीप तिर्की, डिफेन्सांत संदीप सोमेश, बलबीर सिंग सैनी, मोहम्मद रियाज आशिल्ले जाल्यार फॉरवर्डांत मुकेश कुमार, आपूण, समीर दाद, बलजीत ढिल्लो सारके खेळगडे आशिल्ले अशें ताणें म्हणलें.
भांगरा पदक स्विकारपाक भारताचो पंगड पोडियमांत चडलो त्या वेळार आपूण 25 वर्सां फाटीं पावलो. हॉकी खेळ सोडल्यार 19 वर्सां जाली. पूण, हॉकीक अजून फॉलो करता. पॅरीस ऑलिम्पिका खातीर आमकां थेट प्रवेश मेळचो अशी प्रार्थना करतालों अशें ताणें म्हणलें.
आशियायी खेळां वरवीं ऑलिम्पिकाची पात्रताय मेळयल्या उपरांत खूब थाकाय मेळटा. पात्रताय फेरयेंत खेळटना खूब चेपण आसता ताका लागून तयारी करपाक लक्ष लागना अशें पिल्लेन म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
