भांगरभूंय | प्रतिनिधी
हॉकी इंडियान फुडारांत जावपी आशियायी करंड सर्ती खातीर 18 वांगड्यांच्या पंगडाची घोशणा केली. 29 ऑगस्ट ते 7 सप्टेंबर मेरेन बिहारांत नवीन बांदिल्ल्या राजगीर हॉकी स्टेडियमाचेर सर्त चलतली. भारताक जपान, चीन आनी कझाकस्ताना सयत अ गटांत दवरला.
भारत आपली पयली मॅच 29 ऑगस्टाक चीना आड खेळटलो. ते उपरांत 31 ऑगस्टाक जपाना आड आनी 1 सप्टेंबरारक कझाकस्ताना आड खेळटलो. अणभवी ड्रॅग फ्लिकर हरमनप्रीत सिंग पंगडाचें फुडारपण करतलो. पंगडांत अणभवी खेळगड्यांक प्राधान्य दिलां. गोलकीपराची जापसालदारकी कृष्ण बी पाठक आनी सूरज करकेरा हांकां दिल्या. बचाव फळींत मुखेल हरमनप्रीत सिंग आनी अमित रोहिदास हांचे सयत जरमनप्रीत सिंग, संजय आनी जुगराज सिंग हांचो आस्पाव केला. मदले फळयेंत मनप्रीत सिंग, विवेक सागर प्रसाद, राजिंदर सिंग, राज कुमार पाल आनी हार्दिक सिंग हे खेळगडे आसात. आघाडीचे फळयेंत मनदीप सिंग, अभिषेक, सुखजीत सिंग, शिलानंद लाकडा आनी दिलप्रीत सिंग हांची निवड केल्या.
आमी एका अणभवी पंगडाची निवड केल्या. ह्या खेळगड्यांक चेपणाखाला कशी कामगिरी करपाक जाय हें बेस बरें खबर आसा. संवसारीक सर्ती खातीर आमची पात्रताय पणाक लागल्या. ताका लागून आशियायी सर्त आमचे खातीर सामकी म्हत्वाची थारल्या. जांचे मदीं संयम आसा आनी उत्कृश्ट कामगिरी करपाक शकतात अशा खेळगड्यांची आमकां गरज आशिल्ली अशें पंगडाचो मुख्य प्रशिक्षक क्रेग फुल्टन हांणी सांगलें.
पंगडः (गोलकीपर) कृष्ण बी. पाठक, सूरज करकेरा, (डिफॅण्डर) सुमित, जरमनप्रीत सिंग, संजय, हरमनप्रित सिंग (मुखेली), अमित रोहिदास, जुगराज सिंग, (मिडफिल्डर) राजिंदर सिंग, राज कुमार पाल, हार्दिक सिंग, मनप्रीत सिंग, विवेक सागर प्रसाद, (फॉरवर्ड) मनदीप सिंग, शिलानंद लाकडा, अभिषेक, सुखजीत सिंग, दिलप्रीत सिंग.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
