भांगरभूंय | प्रतिनिधी
खबरां संस्था
कराचीः क्रिकेट मळार आतां मेरेन जायत्या बॉलरांक तांचे बॉलींग एक्शना खातीर आडमेळ्यांक तोंड दिवचें पडलें. हे वळेरेंत श्रीलंकेचो आदलो दिग्गज स्पीनर मुथय्या मुरलीधरनाचोय आसपाव आसा. मुरलीधरनाक ऑस्ट्रेलियेन बॉलींग करपाक मनाय केल्ली. आतां पाकिस्तानाचो आदलो स्पीनर सईद अजमलान भारताच्या हजभजन सिंग आनी आर आश्विना सयत जायत्या बॉलरांची एक्शन बेकायदेशीर आसा असो दावो केला.
‘नादिर अली पॉडकास्ट’ यूट्यूब चॅनलाक मुलाखत दितना अजमलान व्हो दुबाव उक्तायला. एक गजाल म्हणल्यार खुद्द अजमनाची बॉलींग एक्शनीचेर जायत्या जांणानी दुबाव घेतिल्लो. ते खातीर 2014 वर्सा ताचेर बॉलींगेचेर बंद घातिल्ली. ते उपरांत वर्स भरयां तो परत खेळपाक लागल्लो मात तो पयलीं सारको प्रभावी नाशिल्लो.
बॉलींग एक्शनी विशीं दुबाव घेवपा सारक्या 20-25 बॉलरांची नांवां हांव सांगपाक शकतां. तातूंत 400-500 विकेटी घेवपी बॉलर लेगीत आसात. हरभजन सिंग, आश्विन नरेन आनी मुथय्य मुरलीधरन हांच्या सारके खेळगडे मेडिकल कंडीशनांत आशिल्ले. फास्ट बॉलरांत कर्टली अॅम्ब्रोस बॉलींग करतना हात फाफुडटालो. ताची बॉलींग एक्शन बेकायदेशीर आशिल्ली अशें अजमलान सांगलां.
म्हजी एक मेडिकल कंडीशन आशिल्ली. म्हजो एक खांदो, मनगट आनी हात वेवस्थीत नाशिल्लो. खांदो 90 अंशां मेरेन वाकता, तो वाकले बगर खांदो उखलप जायना. हे मेडिकल कंडीशनाक लागून म्हाका बॉलींग करपाची परत परवानगी मेळ्ळी अशें ताणे ताचेर केल्ले कारवाये विशीं उलयतना सांगलें. अजमलान आंतरराष्ट्रीय क्रिकेटींत 448 विकेटी घेतले उपरांत ताचे बॉलींग एक्शनी विशीं दुबाव घेतिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
