भांगरभूंय | प्रतिनिधी
ग्रामसभा आतां उक्ते जागेर 29 मार्चाक जातली
पणजी : ग्रामस्थांची उपस्थिती चड आनी जागो ल्हान जाल्ल्यान चिंबल ग्रामसकभेमत आयज तणाव निर्माण जालो. ती उक्ते जागेर घेवपाची मागणी ग्रामस्थांनी सुरवेक केली. ती अमान्य जाल्ल्यान ग्रामस्थांनी हरकत घेवन तिडक उक्तायली. निमणी आयतारची ग्रामसभा रद्द जावन ती 29 मार्चाक घेवपाचो निर्णय जालो. चिंबल पंचायती मुखार उक्ते जागेचेर ती जातली.
थारिल्ले प्रमाण आयतारा सकाळीं पंचायतीच्या सभाघरांत सरपंच संदेश शिरोडकार हांच्या फुडारपणा खाला ग्रामसभेक सुरवात जाली. गोविंद शिरोडकार हांचे सयत युनिटी मॉल विरोधात आंदोलनात आशिल्ले ग्रामस्थ मोठ्या संख्येन हाजीर आशिल्ले. गर्दी जाल्ल्यान ग्रामस्थांक बसपाक लेगीत सुवात नाशिल्ली. हे फांटभुयेर ग्रामसभा पंचायती भायर उक्त्या सुवातेर घेवया. खुर्च्यो दवरपाक आमी मजत करता, असो मुद्दो अॅड. गोविंद शिरोडकार हांचे सयत हेर ग्रामस्थांनी मांडलो. ग्रामसभेची नोटीस 23 फेब्रुवारीक जारी जावन थळ निश्चित जालां. आतां तें बदलपाक मेळचे ना, अशें सांगत सरपंचांनी सुवात बदलपाचो प्रस्ताव न्हयकारलो. हाका लागून ग्रामस्थ चड बेजार जाले. आठ म्हयन्या उपरांत आयतारा ग्रामसभा जाताली. ही लेगीत योग्यरित्या घेवप शक्य जालें ना, अशी हरकत अॅड. शिरोडकार हांणी मांडली.
आयतारचे ग्रामसभेक तीन अजेंडा आशिल्ले. दर खेपो आमी ग्रामसभा हॉलातूच घेतात. हाका लागून आयची ग्रामसभा हॉलात सुरू जाल्ली. तशेच ग्रामसभेची नोटीस लेगीत जारी जाल्ली. निमणे वेळार थळ बदलप शक्य नाशिल्ले. लोकांच्या मागणेक लागून आता ग्रामसभा 29 मार्चाक भायर माटवात घेवपाचो निर्णय जाला, अशें सरपंच संदेश शिरोडकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
