भांगरभूंय | प्रतिनिधी
पणजीः केपें पयलो वर्ग न्यायालयान मे. हयूजेस प्रिसीजन प्रा. लि. (M/s Hughes Precision Manufacturing Pvt Ltd) ह्या कंपनीन दाखल केल्ली याचिका न्हयकारली. कंपनीन नाकेरी-बेतुलच्या आपल्या गुदावाची चावी परत मेळोवपा खातीर ही याचिका दाखल केल्ली. पूण उपजिल्होधिकाऱ्यांनी केल्ले तपासणेंत कितल्याशाच सुवातींनी अनियमितताय आनी सुरक्षेचे उल्लंघन जाल्ल्याचें दिसून आयले म्हूण न्यायालयान हो अर्ज न्हयकारलो.
कंपनीन उपजिल्होधिकाऱ्यांनी दिल्ल्या नेमांक पाळो दिवंक ना अशें न्यायाधीश मनश्री एम. नायक हांणी दिल्ल्या अहवालांत म्हणलां. उपजिल्होधिकारी मनोहर कारेकार हांणी सादर केल्ल्या अहवाला प्रमाण, कंपनीन सुमार 11 हजार किल दारुगुळो (propellant) गरजेचो आशिल्लो ‘पेट्रोलियम अँड एक्सप्लोझिव्ह सेफ्टी ऑर्गनायझेशन’ची (PESO) परवानगी नासतना सांठोवन दवरिल्लो.
अहवालांत फुडें सांगलां, कंपनी कडेन थारायिल्ल्या नेमा प्रमाण सक्तीचें ‘नो ऑब्जेक्शन सर्टिफिकेट’ (एनओसी) नाशिल्लें. तशेंच बेतुल-नाकेरीच्या ग्रामपंचायती कडल्यान बांदकामाचो परवानो घेवंक नाशिल्लो. ते भायर जमनीचो बिगर शेतकी वापरा खातीर गरजेची आशिल्ली ‘लँड कन्व्हर्जन सनद’ कंपनी कडेन नाशिल्ली. सगळ्यांत गंभीर गडाल म्हणल्यार ह्या गुदावांत ‘आपत्ती वेवस्थापन येवजण’ (Disaster Management Plan) लेगीत नाशिल्ली. कंपनीन दारुगुळो सांठोवपा खातीर कॉरोगेटेड बॉक्सचो वापर केल्लो. तशेंच कंपनीन आपत्कालीन बचाव पंगडांक अनधिकृत सांठ्याची म्हायती दिवंक ना. हाका लागून बचाव कार्या वेळार उजो पालोवपी दळ आनी बचाव पंगडांक व्हड धोको निर्माण जावपाचो. मजगतीं, कंपनीच्या एका गुदावांत सांठोवन दवरिल्ल्या दारुगुळ्याचो स्फोट जाल्लो.
कंपनीन ‘पेसो’ परवानो प्रलंबीत आसा आनी न्यायालयाच्या अटींक पाळो दिवपाक तयार आसा अशें सांगलें तरी व्हड प्रमाणांत चुको मेळिल्ल्यान आनी थारायिल्ल्या नेमाचें उल्लंघन जाल्ल्यान न्यायालयान तांची याचिका न्हयकारली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
