भांगरभूंय | प्रतिनिधी
हम भारतवासी है, हम एक है…. ही कविता…. 9 जानेवारी, 1964…. गोंय विधिकार दिनाच्या सुवाळ्यांत ही सगली याद करची. गोंय, दमण आनी दीव विधानसभेचें पयलें अधिवेशन जाल्लें तो हो दीस. अंदू त्या दिसाक साठ वर्सां पुराय जातात. पणजे आदिलशहाच्या राजवाड्यांत जाल्ल्या त्या पयल्या अधिवेशनाचें कामकाज तिगून उल्लां?
गोंय, दमण, दीवचे पयले मुख्यमंत्री दयानंद उर्फ भाऊसायब बांदोडकार. उपरांत तांची धूव शशिकलाताई काकोडकार पयली अस्तुरी मुख्यमंत्री. ताई, भाऊ ह्या संवसारांत नासत, पूण तांचें कर्तृत्व अज्रंवर. भाऊचीं नातरां, पण्टुरां आसात. एखादरे फुडारांत विधानसभेंत पावतलीं. तांकां बरी देख भाऊ, ताई, खाशे आनी भाईची. हांव हिंदुच म्हणून भौशीक बसकांनी सांगपी उद्येगमंत्री मावीन गुदिन्हो बरी देख कशे जातले? धर्म मनात दवरपाचो आसता. धर्मा परस जात व्हड जावपाक लागल्या हें मावीनबाबांक खबर ना? जैत, हार पळोवपी मावीनबाबांक आपलो फुडार समजला आसतलो. तांची अस्वस्थताय तांचीं उतरां सांगतात. त्या उतरांतल्यान गोंयांत धर्मांतरां जाल्लीं अशें ते अचकित सांगून गेल्यात. कोणे केल्लें तांचें धर्मांतर? आयज धर्मांतरां जातात? मावीनबाब सांगत व्हय?
सभापती रमेश तवडकार हांणी ‘हम भारतवासी है, हम हिन्दुस्थानी है…’ ह्या उतरांचो अर्थ मावीनबाबांक, आमदारांक सांगचो पडटलो. गोंय विधिकार मंच, विधिकार दीस सुवाळो सुरु करपी पयलींचे सभापती प्रतापसिंह राणे. तांची देख घेतिल्ली जाल्यार मावीनबाब मुख्यमंत्री जावपाचे. श्री. राणे, भाऊ, भाई, ताई धर्म सदांच मनात दवरुन राविल्ल्यान जैतवंत जाले.
संविधानाच्या अमृतोत्सवी वर्सांतलो गोंय विधिकार दीस हो संविधानकारांच्यो यादी जागोवपी जावचो. ह्या दिसाक पयल्या विधानसभेच्या आमदार, खासदारांकय आर्गां ओंपपाक जाय. विधिकार दिनाच्या दिसा याद जाता आदले आमदार बाबुसो गांवकार हांची. गोंय विधिकार मंच बरोच तेंप तांणी सांबाळ्ळो, नाटकुल्यांतल्यान आवाज उठयलो. आदले खासदार अॅड. अमृत कांसार, आदले खासदार अॅड. शांताराम नायक विचार परगटावपाची संद विधिकार दिसा घेताले. सगल्या आमदार, खासदारांनी सुवाळ्याक हाजीर रावन दिसभराचे भासेभासेंत वांटो घेवप वरिश्ठांचें आयकून चिंतना परगटावप समा जातलें. मंत्र्यांकय भासाभासेंतल्यान शिकूंक मेळटा.
अॅड. कांसार हे कायदो म्हाविद्यालयांत भारतीय घटना हो विशय शिकोवपी. हजारांनी विद्यार्थी आयजय तांची याद काडटात. सत्तेंत आसता तेन्ना सरकारान, सरकारांतल्या वांगड्यांनीच न्ही जाल्यार लोकप्रतिनिधीनींय धर्म पोटांत दवरपाचो आसता ओंठार न्हय. विधिकार दीस म्हणल्यार विधानसभा न्हय, उतरांचो सांबाळून उपेग करुन टीका जावंक शकता. भासाभासे पासत अध्यक्षांची पयलीं मान्यताय घेवची पडटा. जापो मेळोवपाचे येत्न करचे.
अॅड. सदानंद मळीक हांचेवरी आमदारांनी आदल्या आमदारां खातीर चड वेतन, भत्त्यांची तजवीज करुन घेतली. कांय प्रस्न अजूनय सुटावे जावपाचे आसात. नवी आव्हानां, नवें तंत्रज्ञान, समाजीक प्रस्न जेन्ना राज्यांत तयार जातात. स्थलांतरितांचो जावं बेकायदा खोपींचो, घुंवळे वखदांचो, येरादारी कोयंडी, वाडपी अपघातांचो. विधिकार मंच क्रियाशिल जाल्यार अरिश्टां आड झुजपाक सरकाराक बळगें मेळचेंना कित्याक? भुंय, शेतां विकप, कोयर वेवस्थापनावरी प्रस्नाचेर विधिकार दिसाचे कार्यावळींतल्यान सुचोवण्यो फुडें आयल्यो. माजी आमदार तंत्रगिन्यानातल्यान सरकाराच्या फाटल्यान लागल्यार गांवचे प्रस्न कित्याक सुटचेनात?
‘हम भारतवासी है, हम एक है…’ हेच कवितेच्या आदारान गेल्यार गोंयची लोकसंख्या वाडटना दिसता, पूण ते प्रमाण मतदारसंघ वाडल्यात? मतदारसंघांची फेररचणूक जाय? सरकारान कशें फुडें वच्चें हे विशीं मार्गदर्शन मेळटलें. उदरगतीच्या मार्गा वयल्या गोंयचो बदलपी कुटुंब कायदो, कुळ मुंडकार कायदो, कोमुनिदाद कायदो विधेयका पासत विधिकार मंचाचे वांगडी वावुरल्यात. गोंयची उदरगत नेटान जावपा पासत मंचान फुडारांत वावुरचें. पेपरलेस विधानसभे पासत पावल मारपी गोंय विधानसभेचे वांगडी राजेंद्र आर्लेकार राज्यपाल जाल्यात. तांचोय भोवमान जावपाक जाय.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
