भांगरभूंय | प्रतिनिधी
एनआरआय दोन प्रकाराचे आसतात. कांय आवडटे आनी कांय नावडटे. गोंयांतल्यान जे विदेशांत वचून स्थायीक जातात वा थंय वर्साचीं वर्सां नोकरी, वेवसाया निमतान रावतात, ताचेर थोडे लोक टिका करतात. पूण हेच टिकाकार दुसऱ्या राज्यांतल्या एनआरआयंची तुस्त करतात. हे एनआरआय आनी तांचे समर्थक, विरोधक हांची विशिश्ट विचारधारा, धर्म, भास, प्रांत, पक्ष, संघटना आसतात, ते प्रमाण ते वागतात. अर्थात स्वतंत्र विचारांचे मनीस म्हणटकच तातूंत चुकीचें कांय ना. पूण, विरोधांतल्या एनआरआयचेर खर टिका करपांत आमी सगले भारतीय (आनी एनआरआयूय) मुखार आसात.
विदेशांत विविध कारणां खातीर स्थायीक जाल्ल्या गोंयकारांनी पोरूं एका वर्सांत 731 कोटी रुपया गोंयांत धाडल्यात. रिझर्व्ह बँकेच्या अहवालांत ही म्हायती दिल्या. हे क्रमवारींत गोंय 15 व्या स्थानाचेर आसा. पुराय भारतांत साडेस लाख कोटी रुपया आयल्यात. महाराष्ट्र पयल्या क्रमांकाचेर आसा. अर्थांत ज्या राज्याची लोकसंख्या चड थंयचे एनआरआय चड. पंजाब दुसऱ्या क्रमांकाचेर आसा. भारता उपरांत येतात ते चीन, मेक्सिको, फिलिपायन्स, नायजेरिया हे देश. अमेरिका, युएई, युके, सिंगापूर ह्या देशांतल्यान भारतांत चड पयशे
येतात.
लोक भायर वतात, ते बऱ्या पगाराचे नोकरे खातीर, वेवसाया खातीर, शिक्षणा खातीर. हालींच हेनले प्रायव्हेट वेल्थ मायग्रेशन अहवाल उजवाडाक आयला. तातूंत अंदूं साडेस हजार गिरेस्त भारतीय विदेशांत स्थायिक जावपाचे आसात, अशें म्हणलां. पोरूं साडेसात हजार जाल्ले. ही तशी नवी गजाल न्हय. चिनांतल्यान पोरूं 10,800 गिरेस्त देश सोडून गेल्ले. अंदूं 13,500 वचपाचे आसात. ब्रिटनांतले 3200 लोक भायर वचपाचे आसात. हे सगले चड करून अमेरिकेक वा आॅस्ट्रेलियेक वचून रावतात. भारताचे चडशे एनआरआय परत येवंक सोदतात, अशेंय एसबीएनआरआय फिनटेकाचो अहवाल म्हणटा. तातूंत कॅनडांतले 37 टक्के, अमेरिका, ब्रिटनांतल्या सुमार 23 टक्के अनिवासी भारतीयांची निवृत्ती उपरांत भारतांत येवपाची इत्सा आसा. तरणाटे आसतना तांणी रोजगार वा हेर मळांचेर आपलो देश वयर काडपाक योगदान दिलांच अशें ना. आंगांत शक्त आसतना दुसऱ्या देशांत वचून कश्ट करप, तो देश वयर काडप आनी थकले म्हणटकच भारतांत येवप, हें आनीक कितलो तेंप चलतलें, तें सांगपाक येना. भायर वचपाचो आंकडो उणो जावंक जाय. कल्पना करात, सध्या भारतांतले पयले 10 उद्देगपती साटली-पोटली कवळून विदेशांत गेले!! कितें जातलें? बेरोजगारी वाडची ना? अर्थवेवस्था धपक्याक सकयल येवची ना?
प्रधानमंत्री नरेंद्र मोदी हांणी एनआरआयंक भारतांत परत येवन उद्देग, धंद्याच्या मळार देवपाचो उलो मारला. कितले आयल्यात तें खबर ना. पूण तांणी हांगा उद्देग घाल्यार बेकारी सोंपतली, देश वयर सरतलो. पूण मुळांत कोण विदेशांत वचपाकूच जायनात, हे खातीर यत्न जावंक जाय. ऐन भरांत आसतना मायभूंयेक, देशभाव- भयणांक मदतीचो हात दिवप ना. (फक्त पयशे धाडपा पुरतो) आपलो मेंदू भायले देश वयर काडपाक वापरप… हेंच तांकां भारतांत रावन करप शक्य जातलें, अश्यो संदी सरकारान दिवप शक्य ना? एके अमेरिकेंत भोवतेक कंपनींच्या पयल्या पांच अधिकाऱ्यां मदीं उणेच दोगजाण तरी मूळ भारतीय आसात. तांचीं नांवांय सगल्यांक खबर आसात.
हुशार, बुदवंत भारतीय पांच वर्सां भायर रावन आयलो जाल्यार कोणाक व्हडलेशें कांय दिसना. पूण ते 15- 20 वर्सां भायर रावतात. चडशे थंयच स्थायीक जातात. आयलेच परत जाल्यार पिरायेची साठी हुपतकच! दुसरे वटेन ते बोटीर, आखाती देशांनी, युकेक गेले काय आमी टिका करतात, पूण ते कित्याक वतात, ताचोय अभ्यास जावंक नाका? तांकां हांगां रोजगार मेळ्ळो जाल्यार ते भायर कित्याक वतले? रोजगारा खातीर देशांतर्गत जाता तें स्थलांतरूय बंद जावंचें. उत्तरे कडल्या राज्यांतलें लाखांनी लोक देशांतल्या म्हानगरांनी स्थायीक जाल्यात. कोरोनाच्या काळांत तें कळ्ळां. म्हानगरांची, गोंय सारक्या ल्हान राज्यांची नाडी ह्या स्थलांतरीतांच्या हातांत आसा, ते परत गांवांक गेले काय कितली अडचण जाता, ताचोय अणभव संबंदीत राज्यांच्या नागरिकांनी घेतला. आमच्या देशाचीय युरोप, अमेरिके सारकी सर्वांगी उदरगत जाल्यार पोटा खातीर दुसरे कडेन वचपाचो हो यक्षप्रस्न सासणाचो सुटावो जातलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
