भांगरभूंय | प्रतिनिधी
भारताची पयल्या क्रमांकाची बायल ग्रॅण्डमास्टर कोनेरू हम्पीक बायलांचे फिडे कॅण्डिडेट बुद्दीबळ सर्तीचे सेमी फायनलींत पावपाक फक्त अर्द्या गुणाची गरज आसा.
अ गटांत तिचे आनी युक्रेनाचे एना मुजयचूक हांचे मदीं क्वॉर्टरफायनल चालू आसा. हम्पीन काल जाल्लो तिसरो डाव बादाबाद दवरून 2-1 अशी आघाडी मेळयली.
चवथो आनी निमाणो डाव बादाबाद लेगीत दवरता जाल्यार हम्पी सेमी फायनलींत पावतली. दुसरे वटेन एनाक सर्तींत पुनरागमन करपाक जाय जाल्यार निमाणो डाव खंयच्याय परिस्थितींत जिखपाक जाय, तेन्नाच मॅच टायब्रेकरांत वतली.
तिसरे फेरयेंत धव्या घुलांनी खेळपी हम्पीन क्युजीडी ओपनिंगांत सुरवातीकूच वजिराची अदलाबदली करून अॅण्डगेम वटेन डाव व्हेलो आनी खर यत्न करून लेगीत एनाक डावाचेर आपलो शेक दवरपाक मेळूंक ना आनी अखेरेक 42 चाली उपरांत दोगूय खेळगडयांनी डाव बादाबाद दवरपाक सहमती दाखयली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
