भांगरभूंय | प्रतिनिधी
तेल अविव, खबरां संस्था ः हमासान शेनवारा सकाळीं इस्रायलाचेर सुमार 5 हजार रॉकेटां उडयलीं. उपरांत ताका जाप दितना इस्रायल सैन्यान दनपारां हमासाच्या अड्ड्यांचेर क्षेपणास्त्रां मारपाक सुरवात केली. हाका लागून गाझा पट्टेंत चकमक सुरू जाल्या.
गाझा पट्टे लागसार शेक गाजोवपी ‘हमास’ हे पॅलेस्टायन समर्थक गुप्तचर संघटनेन सकाळीं अचकीत रॉकेट फायर करपाक सुरवात केली. उपरांत इस्रायलांत झुजाचे सायरन वाजले. हे सायरन सकाळीं जेरुसलेमांत आनी ताचे भोंवतणच्या वाठारांत वाजयले. आतां मेरेन ह्या हल्ल्यांत एके बायलेक मरण आयले आनी 16 इस्रायली नागरिक जखमी जाल्यात. तातूंतले दोन गंभीर आसात. दोन वरां परस चड काळ इस्रायलांत पांच हजारां परस चड रॉकेटां पडलीं. हे घडणुकेक लागून इस्रायलान रोखडीच सैन्याक झुजाची तयारी करपाचो आदेश दिलो. ते प्रमाण दनपारां मेरेन तांणी गाझा पट्टेंत प्रतिहल्लो सुरू केलो. तशेंच गाझा भोंवतणच्या लोकांक सुरक्षीत सुवातेर रावपाची शिटकावणी लश्करान दिल्या.
मजगतीं, इस्रायल संरक्षण दळाच्या म्हणण्या प्रमाण ते गाझा पट्टेचेर नियंत्रण मेळोवपा खातीर हवाई हल्लो करतात. हमासाच्या अचकीत हल्ल्या उपरांत सुमार दोन वरां उपरांत हे हल्ले सुरू केल्यात. आयडीएफचो मुखेल लेफ्टनंट जनरल हर्झी हालेवीन, ह्या हल्ल्या फाटल्यान हमासाचो हात आसा आनी ताचे परिणाम तांकां भोगचे पडटले अशी शिटकावणी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
