भांगरभूंय | प्रतिनिधी
हमजा शेख (112) हाचो शेंकडो आनी राल्फी एल्बर्ट आनी जॅक होम हांचे चिवट बॅटिंगेच्या नेटार इंग्लंडाच्या 19 वर्सां पिराये सकयल्या पंगडान भारताच्या 19 वर्सां पिराये सकयल्या पंगडा आडची पयली टॅस्ट मॅच निमाण्या दिसा बादाबाद दवरपाक येस मेळयलें.
350 धांवड्यांचे मोखीचो फाटलाव करपाक मैदानांत देंवपी इंग्लंडान निमाण्या दिसा आपल्या दुसऱ्या डावांत 7 विकेटी व्हगडावन 270 धांवड्यो केल्यो.
भारतान दुसऱ्या डावांत विहान मल्होत्रा (63) आनी आर एस अंब्रीश (53) हांच्या अर्द शेंकड्यां नेटार 63 ओव्हरींनी 350 धांवड्यांची मोख दिली. आर्ची वॉनान इंग्लंडा वतीन 84 धांवड्यो दिवन 6 विकेटी घेतल्यो.
मोखीचो फाटलाव करपी इंग्लंडाची सुरवात बरी जाली ना. ताणें आपल्यो पयल्यो तीन विकेटी रोखड्योच व्हगडायल्यो. ते उपरांत हमजा शेख आनी बेन मेयस हांणी 119 धांवड्यांची भागिदारी केली. मेयस 51 धांवड्यो करून बाद जालो. शेख 112 धांवड्यांची खेळी करून धांवबाद जालो. रियू 50 धांवड्यो करून बाद जालो, त्या वेळार भारताची जैताची आस्त वाडली. पूण, अखेरेक राल्फी आनी जॅक हांणी 11.5 ओव्हरी मेरेन बॅटींग करून मॅच बादाबाद दवरली.
ते पयलीं भारतान निमाण्या दिसा 229 धांवड्यांचे आघाडी वयल्यान मुखार खेळपाक सुरवात केली. ताच्या हातांत 7 विकेटी आशिल्ल्यो. मल्होत्रान आपलो अर्द शेंकडो पूर्ण केलो. पूण, ते उपरांत तो रोखडोच बाद जालो. ते उपरांत पावसान आपली हाजेरी लायली. पावसा उपरांत मॅच परतून सुरू जाली आनी जेवणाच्या विसवा पयलीं भारतान आनीक दोन विकेटी व्हगडायल्यो.
वॉनान मोहम्मद इनान (5) आनी हेनिन पटेलाक रॉकीन बाद केलो. ताची ही पांचवी विकेटी आशिल्ली. जेवणाच्या विसवा मेरेन भारतान 8 विकेटी व्हगडावन 209 धांवड्यो केल्ल्यो. ते उपरांत भारताचो डाव 57.4 ओव्हरींनी 248चेर सोंपलो. अशे तरेन इंग्लंडाक जैता खातीर 350 धांवड्यांची मोख मेळ्ळी.
इंग्लंडाची सुरवात बरी जाली ना. ताचो ओपनर ए वॉन फकत तीन धांवड्यो करून तंबूंत परतलो. ताका देवेंद्रान बाद केलो. ते उपरांत जेडन डॅन्लीन अंब्रीशाक हूक मारपाचो यत्न केलो. पूण, ताचो हो यत्न फुकट गेलो आनी शिमे लागसार कॅच बाद जालो. फ्लिंटॉफ 11 धांवड्यो करून बाद जालो.
च्या च्या विसवा मेरेन इंग्लंडान 83 धांवड्यांचेर 3 विकेटी व्हगडायिल्ल्यो.
शेख हाणें सिंगाक सको मारून आपलो अर्द शेंकडो पूर्ण केलो. भारताक मेयसाक बाद करपाची बरी संद आशिल्ली. एक धांवडी घेवपाच्या यत्नांत मेयस धांवलो. त्या वेळार भारताच्या फिल्डरान चुकीचे विकेटी वटेन बॉल मारलो आनी मेयसाक परतून क्रिजींत येवपाक संद मेळ्ळी. ते उपरांत ताणें आपलो अर्द शेंकडो पूर्ण केलो. अखेरेक 51 धांवड्यांचेर बाद जालो.
ते उपरांत आयिल्ल्या बॅट्समनांनी सादूरतायेन बॅटींग करून मॅच बादाबाद दवरली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
