भांगरभूंय | प्रतिनिधी
जोयडा : हनूर बफर वाठारांतल्या पच्चेदोड्डी लागसारच्या रानांत एका 12 वर्सांच्या दादलो वागाचे तीन कुडके करून ताका मारून उडयिल्ल्याचें मुखार आयलें. बिरेस्तारा सांजेवेळार स वरांचेर गस्त घातिल्ल्या रान कर्मचार्यांक ह्या भागांत जमनींतल्यान कसलो तरी घाण आयिल्ल्यान दुबाव आयलो. तांणी जमीन खणून माती काडून पळयलें तेन्ना तांकां वाठाच्या पांयांचो भाग सांपडलो. उपरांत तांणी रोखडीच हे विशीं वरीश्ठ अधिकार्यांक म्हायती दिली.
शुक्रारा सकाळीं, एसीएफ विराज होसूर हांचे सयत अधिकारी घडणुके सुवातेर दाखल जाले. तपासा मजगतीं वाघाचे कुडीचो आनीक एक भाग मेळ्ळो. मात ताचे फाटलो भाग गायब आशिल्लो. अधिकार्यांनी खोलायेन तपास केले उपरांत हो प्रकार शिकारेचो आशिल्ल्याचें निश्चीत जालें. उपरांत क्रायम सीन टीम, पुलीस, बंडीपूरचें सुण्यांचो पंगड आनी फिंगरप्रिंट पंगड घडणुके सुवातेर दाखल जालो. तांणी उरिल्ल्या कुडींचो सोद घेतलो. पोस्टमार्टमा उपरांत कुडी लासल्यो. ह्या प्रकरणांत रान विभागान एका थळाव्याचेर दुबाव उक्तायला. सुणे तपासा मजगतीं सरळ त्या मनशाच्या घरा पावले. मात चवकशी सुरू जातांच तो दुबावीत मनीस पळून गेलो अशें मुखार आयलां. ताचो सोद सध्या घेतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
