भांगरभूंय | प्रतिनिधी
भोपाळ, खबरां संस्था : लग्ना उपरांत हनिमुनाक वचप ही सामान्य गजाल. हनिमुनाक खंय वचप हें जायतीं जोडपीं लग्ना आदीं पसूनच थारायतात. हनिमूना वतना तो उगडासांत कसो उरतलो हे खातीर जोडपीं यत्न करतात. मात, हनिमुनाक सावन परतल्या उपरांत कोणें घटस्फोट मागला? मात ह्या जोडप्या वांगडा हें घडलां. घोवान हनिमुना खातीर गोंयांत या म्हणून सांगिल्लें, मात तो अयोध्येक घेवन गेलो. हें कारण दिवन बायलेन घोवा कडेन घटस्फोट मागलो.
बायलेचें कितें म्हणणें?
हनीमुनाक गोंयांत व्हरतलों अशें सांगून म्हज्या घोवान म्हाका अयोध्येक व्हेली अशी कागाळ करून हांवें घटस्फोटाचो अर्ज दाखल केला. इतलेंच न्हय, घोवान आपले आवयकूय आमचे वांगडा व्हेली, अशें बायलेन सांगलां. तशेंच हे घडणुके उपरांत रागान भरिल्ले बायलेन सरळ न्यायालयांत घटस्फोटा खातीर अर्ज केला. ही घडणूक मध्य प्रदेशाची राजधानी भोपाळांत घडली.
नेमकें कितें घडलें?
भोपाळांतल्या पिपलानी हांगा रावपी ह्या जोडप्याचें लग्न ऑगस्ट २०२३ वर्सा जालें. बायलेन दिल्ले म्हायती प्रमाण तिचो घोव आयटी मळार काम करता आनी ताका बरो पगार मेळटा. हनीमूना खातीर परदेशांत वचप लेगीत तांचे खातीर व्हडलीशी गजाल न्हय. अशें आसून लेगीत ताणें ताका हनीमूना खातीर अयोध्येक व्हेली. तशेंच वांगडा घोवान आपले आवयकय घेतली. घोवान आपणाक आनी मांयक अयोध्या, बनारस हांगा व्हेल्ल्यान बायल बरीच तिडकली. घोवान हनीमूना खातीर परदेशांत वचपाक न्हयकार दिलो. ताणें सांगलें, म्हाका म्हज्या आवय-बापायची सेवा करपाची आसा. ताका लागून आमी देशांतूच खंयूय हनिमुनाक या. ते उपरांत आमी दोगांयनी गोंयांत वचपाचें थारायलें. पूण गोंयांत व्हरचे बदला तिच्या घोवान तिका अयोध्येक व्हेली, अशें घटस्फोटा खातीर अर्ज केल्ले बायलेन सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
