भांगरभूंय | प्रतिनिधी
पणजी: हणखणें सरकारी माध्यमीक विद्यालयाच्या सांस्कृतीक क्लबा वतीन विद्यालयाचे मुख्याध्यापक तशेंच नाट्य लेखक नरेंद्र नायक हांच्या ‘देवा तुझा मी सोनार’ ह्या नाट्य पुस्तकाचें प्रकाशन गोंय माध्यमीक आनी उच्च माध्यमीक शिक्षण मंडळाचे अध्यक्ष भागीरथ शेट्ये हांचे हस्तुकीं हालींच हनखण्यां जालें.
ह्या वेळार माचयेर नाट्य लेखक नरेंद्र नायक, हणखणें इब्रामपूर पंचायतीचे उपसरपंच कृष्णा हरिजन, शाळा वेवस्थापन समितीच्यो अध्यक्षा अश्विनी घाटवळ, पालयें पंचायतीचे पंच वांगडी सागर तिळवे, नाट्यदिग्दर्शक अर्जून तिळवे, विद्यालयाच्या सांस्कृतीक क्लबचे मुखेली शिक्षक रामा बिचोलकार, ज्येश्ठ शिक्षिका नीता पेडणेंकार बी मानेस्त हाजीर आशिल्ले.
नरेंद्र नायक हांच्या धाव्या नाट्य पुस्तकाचें प्रकाशन केले उपरांत तांकां शुभेत्सा दिवन भागीरथ शेट्ये हांणी म्हणलें, उत्कृश्ट लेखन करपाचें आसत जाल्यार पयलीं लेखक हो बरो वाचक आसूंक जाय. भोवआयामी व्यक्तीमत्व लाबिल्ले नरेंद्र नायक हें सेगीत बरयत आसतात. तांणी आयज मेरेन 17 नाटकां बरयल्यांत. तातूंतलीं 10 नाटकां पुस्तक रुपांत प्रकाशीत जाल्यांत. सरकारी सेवेंत कार्यरत रावन लेगीत तत्परतेन कार्य करतना लेखन साहित्यांत सातत्य राखप हें खूब व्हड दिव्य आसा, आनी हें दिव्य नरेंद्र नायक हें बरे वाचक आशिल्ल्यान शक्य जालां. विद्यार्थ्यांनी तांचे पसून आदर्श घेवन विद्यार्थी दशे सावनूच वाचनाची आवड निर्माण करची.
नरेंद्र नायक हांणी कार्यावळीचें प्रास्तावीक करून आपल्या मनोगतांत नाट्य पुस्तका विशीं म्हायती दिली. मानेस्तां हस्तुकीं दिवली पेटोवन कार्यावळीची सुरवा जाली. शिक्षक रामा बिचोलकार हांणी हाजीर आशिल्ल्यांक येवकार दिलो. मानेस्तांची वळख आनी कार्यावळीचें सुत्रसंचालन शिक्षिका मनिषा आडेलकार हांणी केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
