भांगरभूंय | प्रतिनिधी
प्रधानमंत्री नरेंद्र मोदी हांची ताजी अमेरिका भेट तशी खूब फायदेशीर थारली. भारत आनी अमेरिका ह्या दोन लोकशाय देशां मदल्या इश्टागतीच्या संबंदाक नवे मोडण दिवपी ही भेट आसा अशा उतरांनी ताचे वर्णन करतात. पूण आमच्या विरोधी पक्षांक मात नरेंद्र मोदी हांच्या अमेरिका भेटींत कांयच साद्य जालें ना अशें दिसता. वा ही भेट फळादीक जाली ना असोच कितें तरी तांचो दावो आसा. नांवा खातीर आसूं मुखेल विरोधी पक्ष आशिल्ल्या काँग्रेसी पसून आम आदमी आनी उबाठा शिवसेने सारक्या चिल्लर पक्षांचे फुडारी लेगीत नरेंद्र मोदी हांणी आपले अमेरिका भेटींत नेमकें कितें करूंक जाय आशिल्लें आनी तांणी नेमकें कितें केलें ना हें सांगतना आनी थकून वता आसतना दिसनात. राहूल गांधीच्या रडाराचेर सदांच आशिल्ले उद्देगपती गौतम अदानी हांचे आड अमेरिकेंत नोंद केल्ल्या तथाकथीत गुन्यांवाची नरेंद्र मोदी हांणी हे भेटींत फाटपुरवण करूंक जाय आशिल्ली आनी तो तांणी करूंक नाशिल्ल्यान ही भेट फळादीक जाली ना असो विरोधकांचो दावो आसा तेच प्रमाण थंयची बेकायदेशीर भारतीय स्थलांतरितांक हद्दपार करतना अमेरिकन प्रशासनान खर भुमिका घेवन जे पद्दतीन तांची रवानगी केली तो विशय लेगीत प्रधानमंत्री नरेंद्र मोदी हांणी अध्यक्ष डॉनाल्ड ट्रंप हांचे कडेन जाल्ले चर्चे वेळार उपस्थीत केलो ना म्हणून तांणी टिकेचें सत्र चालूच दवरलां. प्रधानमंत्र्यांनी दोनूय देशांच्या परपस्पर संबंद एक वेगळे उंचायेर वा टप्प्यांत व्हरपा खातीर केल्ली चर्चा काँग्रेस आनी हेर विरोधी पक्षांक मान्य ना. आमच्या शक्तीशाली देशाचो बावटो प्रतिकूल परिस्थितीत लेगीत नरेंद्र मोदी हांणी अमेरिकेचे भुंयेर कसो हुबयत दवरलो हाचे कडेन तांकां कांयच देणेघेणे ना हेंच हातूंतल्यान ठळकपणान दिसून येता.
आपल्या घरांत जबरदस्तीन बेकायदो रितीन घुशिल्ल्यांक घरा भायर काडटना एखाद्यान तांचो मान राखचो अशें कोणूय म्हणटात आसत जाल्यार ते घडये पटचें ना. आतां अमेरिकेंत बेकायदो प्रवेश करप्यांक सगल्या देशांच्या नागरिकां आड कारवाय जावप जाल्यार अपरिहार्यच आसा, मागीर भारतीय स्थलांतरितांक हद्दपार करतना वायट वागणूक दिल्ले खातीर ताका आक्षेप घेवन बोवाळ घालून गरजे भायर नाका आशिल्लो वाद माजोवप्यांक कितें साद्य करपाचें आसा हें कळपाक मार्ग ना. कांय जाणांक अमेरिकेचो अहंकार दिसता आनी अती अहंकारा खातीर अध्यक्ष ट्रंप हांणी हें उबारिल्लें पावल आसा अशें तांकां दिसता. अमेरिकेंतल्या बेकायदो स्थलांतरितांक हद्दपार करपाचे प्रक्रियेक ट्रंप परतून सत्तेर येत सावन गती मेळ्ळ्या आनी अशा भारतीय स्थलांरितांक घेवन काल मेरेन तीन विमानां भारतांत दाखल जाल्यात. हद्दपार करतना अशा नागरिकांक मानान धाडूंक जाय आशिल्लें अशी विरोधकांची अपेक्षा आसा? हाची जाप तांणी पयलीं दिवची पडटली. घुसखोरांची हद्दपारी कशी करप हे विशींचें दरेक देशाचें वेगळेवेगळे धोरण थारिल्लें आसता, आनी ते प्रमाण आतां मेरेन अशी हद्दपारी जाल्ली आसत जाल्यार आतांच ताचे आड आवाज काडून विरोधक नेमकें कितें साद्य करूंक पळयतात हें कळत नासलें तरी प्रधानमंत्री नरेंद्र मोदी आनी केंद्रातल्या तांच्या सरकाराक बदनाम करपाचे प्रक्रियेचो तो एक भाग आसा अशें म्हणूंक मेळटलें.
बेकायदो स्थलांरितांक घेवन येवपी विमानां अमृतसर विमानतळारूच कित्याक देंवतात असो प्रस्न उपस्थीत करून पंजाबाचे मुख्यमंत्री भगवंत मान हांणी ह्या प्रकरणाक आनीक फोडणी दिवपाचो यत्न केला. ‘डेथ रूट’ वा मृत्यू मार्गान अमेरिकेंत बेकायदो रितीन प्रवेश करपी भारतीयां मदीं पंजाबी लोकांचोच चड आस्पाव दिसून येता. पंजाब आनी हरियाणांतल्या लोकांची संख्या 80-85 टक्क्यां परस चड आशिल्ल्यान स्थलांरितांक घेवन येवपी विमानां अमृतसराक देंवोवपाचो निर्णय घडये घेतिल्लो आसत जाल्यार समजुपा सारकें आसा. पूण हांगाय आम आदमी पक्ष आनी पंजाबाचे मुख्यमंत्री भगवंत मान हांकां राजकारण करपाचो मोह आवरूंक आयलो ना. पंजाबाक बदनाम करपाचो केंद्राचो हो डाव आसा ते आरोप करतात तेन्ना हें हांसपा सारकें दिसता. पंजाब आनी पंजाब्यांक बदनाम करपाचे षडयंत्र रचतात अशें भगवंत मान म्हणटात. पंजाबांतल्यान अशा मार्गान लोकांक अमेरिकेंत धाडपी ट्रॅव्हल एजन्सींचेरूय सरकाराचो रोख आसूंक शकता आनी ताचे आड खर कारवाय जावची अशें सरकाराक दिसता आसत जाल्यार तें चुकीचें अशें कितें हें कळना. दुसऱ्या विमानांतल्यान भारतांत धाडिल्ल्या बेकायदो स्थलांरितां मदीं दोगां गोंयकारांचो आस्पाव आसा हाचीय दखल घेवची पडटली. डॉलर्स जोडपा खातीर अमेरिकेंत बेकायदो रितीन प्रवेश करप्यांक कशें आडावंक येतलें हाचो पयली विचार जावपाची गरज आसा.
अमेरिकन प्रशासनान आपल्या सेनादळाच्या विमानांतल्यान स्थलांरितांक धाडटना हाताक बेडयो आनी पांयांत बेडयो घाल्ल्यानूय प्रधानमंत्री नरेंद्र मोदी हांणी आपल्या अमेरिका भेटींत ताचेर रोखठोक उलोवपाक जाय आशिल्लें अशेंय विरोधी फुडाऱ्यांक दिसता, पूण ते करतनाय अमेरिकेन सादुरताय बाळगुची हें समजूंक शकता. बेकायदो कृत्य करपी लोकांचेर निमाणें कितलो विस्वास दवरचो होवूय प्रस्न आसा. विमानांत हे लोक आक्रमक जावन मस्ती करपाक लागले जाल्यार तांकां आडावपाक येवचें ना हो विचार करून बेडयो घाल्यो अशीय ताचेर सारवासारव करतात. गुन्यांवकारांचे मानसीकतेचो विचार करीत जाल्यार हें कारण बरोबर आसा अशेंच म्हणचें पडटलें. पूण एक गजाल खरी आसा की अशें धाडस हाचे मुखार कोणेय करचे न्हय हे खातीर हो एक धडो आसा अशेंय म्हणूंक येतलें. पन्नास साठ लाख रुपया खर्च करून शेंकड्यांनी लोक ट्रॅव्हल एजंटाचे मजतीन बेकायदो मार्गान अमेरिकेंत प्रवेश करीत आसतना अशा लोकांनी खंयचेंय तोंकाचें पावल उबारचे पयलीं हाचे पसून बोध घेत जाल्यार अशे प्रकार थांबपाक मजतूच जातली. मानान परतून धाडटात आसत जाल्यार हें सत्र थांबोवपाची शक्यताय बाळगूंक येवचें ना. हाका लागून स्थलांरितांचे हद्दपारीचेर गरजे भायर नाका आशिल्लो वाद करप कितलो मेरेन योग्य आसा हाचो विचार करचो पडटलो. भारतांतल्यान व्हड संख्येन अमेरिका वा हेर कांय देशांनी रोजगारा खातीर ह्या ना त्या मार्गान वचूंक पळोवपी शिक्षीत तरणाट्या वर्गा खातीर सरकाराक सगल्यांत पयलीं अशीं कांय खर पावलां उबारचीं पडटलीं जाल्यारूच अशा प्रकारांक आळो बसतलो.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
